8月26号夜里逸夫舞台一定交关闹猛，因为上海说唱大师黄永生将演一场《曲苑芬芳--黄永生大家唱500期庆贺专场》。 

　　近抢把，上海说唱大师黄永生交关焐心，记得“文革”结束后，伊个一段《古彩戏法》“毯子身浪向盖一盖”红遍上海滩，跑到马路浪向侪晓得伊叫黄永生。还有人索性【干脆】叫伊“变古彩戏法个爷叔”。当时上海说唱交关吃香，伊一日最多要赶六七只场子，根本呒没出场费个概念，人家一邀请伊就到。眼睛一眨30几年过去了，现在大家改口叫伊“上海1号”！黄永生对上海说唱情有独钟，伊拿从前城隍庙梨膏糖叫卖声到潮流滑稽刘春山再到伊师傅绕口皇帝袁一灵个传统说唱进化改良，搬上舞台搭仔灌录唱片、卡带；并发明“三敲板”，拖一根红颜色长长个须须头，巧妙融入戏曲手眼身法步，伊一口“刮辣松脆”个喉咙，有张有弛、有慢有快、慢而勿断、快而勿乱。伊个代表作有《热心人》、《买药》、《香烟头》等。黄永生之所以能够获得大家欢喜搭认可，是因为伊垃拉继承传统说唱基础浪向又有新个突破，关键伊摆准足了创作中个“三非”关系，即：一.非唱勿可主旋律。譬如：《好市长》、《迎世博》等，既赶时髦又树正气；二.非定向创作。经过采风、体验有感而发个段子，像《做人要做13点》、《老年人想穿点》、《朋友》等；迭些段子集观赏性、互动性、传播性于一体；三.非物质文化遗产。像传统名段《金陵塔》、《麻将金陵塔》以及各地方戏曲流派、山歌民谣等著名曲牌曲调，展示说唱难度技巧个同时又保留传统曲目。 

　　黄永生退休之后还是留恋舞台，登门请教沪剧泰斗王盘声探讨上海说唱未来走向；思考哪能拿上海说唱扎实个传承下去，伊还发现人才、培养新人。伊前后收了10几个徒弟，其中关门弟子7岁个连彬尧通过黄永生言传身教，表演逐步“老茄”起来了。1999年垃拉徐汇街道文化活动中心支持下，《黄永生大家唱》正式启动，伊即兴编唱时事、大事、要事，风雨无阻、雷打勿动。迭趟第七届市文代会授予黄永生为首批市文联荣誉委员称号！