囡儿【女儿】放暑假要报游泳训练班，一看咾学费侪是三五百块一期，价钿大得吓人。想想阿拉从前，几分洋钿一张游泳票，大家也舍勿得买。

　　老早上海人有句经常讲个口头语：“黄浦江是呒没盖头个！”迭个里向意思有两层：一个是侬随时随地可以跳进去，包括要寻死；另一种是针对阿拉小人来讲，也就是免费游泳了。因为我小辰光就住垃拉黄浦江边浪，所以也享受到“呒没盖头”个好处。记得搿辰光个大热天，阿拉总归跟弄堂里个大小朋友，一道到黄浦江边去白相水。阿拉弄堂斜对面就有一只码头，左右两旁边分别是一家棉纺厂搭一家锅炉厂。过去管理比较松，也呒啥人管，一帮子小囡是长驱直入，直通黄浦江。不过迭个辰光我还勿会游泳，所以只好垃拉江边浅水区白相相，碰着下半日退潮辰光，阿拉还会得垃拉黄浦江滩涂浪，用根竹筷挑小蟛蜞呢！我看几个水性好个高年级朋友像“浪里白条”，垃拉黄浦江里游来游去，邪气崇拜。记得老早摆渡钿是6分，弄堂里有一老兄，要到浦东白相，为了省迭个6分洋钿，居然一家头横渡黄浦江！尽管我常常去黄浦江边白相，不过真正学会游泳还是拉垃游泳池里。我小学辰光参加游泳培训班每场一小时买3分洋钿学生票，搭今朝碰碰二三十元一场勿好比。不过尽管介便宜，觉着天天去泳池个人还是勿多，垃拉1分洋钿都恨勿得掰成两半用个年代，大家对几分一角，还是好省就省啦。

　　除脱黄浦江跟游泳池，弄堂里还有一种白相水个游戏，就是闷水。“闷水”，就是用一只揩面盆装满清水，摆了骨牌凳浪，然后拿头埋进面盆清水里，憋气越长，迭个人就越厉害。搿个辰光人闷水是大家互相之间寻开心首选个乐趣。比方讲，碰着啥人憋气结束要出水辰光，旁边总归有人会突然揿牢伊个头，勿让伊上来，乃末“咕噜咕噜”，伊只好大口吃水。像搿种“恶作剧”，其实风险蛮大，但当时是家常便饭。还有一种“闷水”比赛就是两人各立垃一盆水前待命，做裁判个公证人看好辰光，一记：“开始”，两人豪燥屏牢呼吸拿头埋进面盆水里，啥人先出来就算啥人输脱。搿种闷水比赛顶怕裁判“帮忙”了，因为两只头一道伸进面盆内，外头个情况一眼勿晓得，有种人闷到一半，偷偷叫换一口气再继续闷下去，裁判看见也“装戆”，葛末旁边人一口气闷得再长，照样也要输拔伊。

　　现在个小囡已经勿白相搿种“闷水”游戏了。