老底子有句闲话，叫做“三泾勿如一角”。三泾指个是枫泾、泗泾、朱泾，侪是上海郊区邪气有名个古镇。一角就是朱家角，名气乓乓响。啥个道理？一个地理位置照角里人讲法是“好去好来【好得很】”！朱家角贴隔壁是淀山湖，几乎同苏浙上海侪搭界，勿单单是富裕个鱼米之乡。从明清以来，更加是商贸重镇，米市邪气兴隆，三里长街，千爿店铺，闹猛得勿得了。伊古色古香个明清建筑数不胜数，36座大大小小个石桥千姿百态，长条麻石铺个街道四通八达，碰着落毛毛雨辰光，人垃拉上面走，好像置身于老里八早个梦里向。整个古镇拨垃珠溪左拥右抱，的的刮刮个江南水镇风光。现在慕名来白相个游客多得造反，大家拿到朱家角白相当作一桩发思古之情个邪气适意个休闲。

　　勿瞒侬讲，阿拉到朱家角是老白相了，阿拉姑妈就住垃角里东湖街浪。阿拉小辰光就跟仔阿伯到朱家角去吃喜酒，寒暑假里，也要去白相几日。我有了工作后，有一年春节里心血来潮，带仔表弟、同学，三个人踏仔三部脚踏车到朱家角去兜兜。迭个辰光，过了西郊公园，沿途侪是菜园、稻田、竹林、杂树、农舍、小河浜、大河浜；春天里油菜花铺天盖地。经过青浦南门，能够看到一座灰白色个塔顶毁坏个古塔；在朝西十几里路，一片开阔湖荡，酒厂个老酒甏叠垃湖边，朱家角就垃拉眼门前了。进了角里，两棵百年白果树长得弹眼落睛，介高介大个白果树，垃拉上海市区恐怕勿多见。放生桥、北大街、城隍庙、课值园、大清邮局……现在侪是必去个旅游竟点。不过阿拉小辰光欢喜早浪向跟仔大人去农贸市场轧闹猛。农贸市场垃拉城隍庙空地浪向，从庙门口到大殿两旁侪是人轧人。刚从淀山湖里捕捞上来活剥乱跳个鱼虾，网兜里个大闸蟹，农民饲养个草鸡白乌龟（鹅），碧绿生青个时鲜蔬菜，老菱、嫩藕、莲蓬、地梨，应有尽有，价钿也比市区菜场便宜。阿拉阿伯嗜好孵茶馆店，茶馆店也垃拉城隍庙里向个楼浪。早浪向茶馆店里兴起兴来，除脱当地搭仔上镇个老查克，大多数是卖脱农副产品个上了岁数个农民，买大饼油条或者一包生煎馒头，泡一壶茶，吃吃讲讲，邪气扎劲。

　　阿拉还欢喜从一座桥跑到另外一座桥，从迭条小巷钻进伊条夹弄，穿来穿去兜白相，立垃东湖街河浜头，看人挥长竹头赶着放羊辣河里个鸭子上岸进棚，夕阳正慢吞吞从石拱桥浪落下来，河面铺撒了晚点碎金，亮得刺眼睛。

　　现在游客能够垃拉朱家角品尝到扎肉、青豆、松糕、粽子咾啥，能够乘了摇橹个木船垃珠溪里向荡来荡去。不过夕照下赶鸭个场景，恐怕难板看到了。