《阿必大》是沪剧传统剧目之一，长期来深受观众欢迎。伊通过一个童养媳个悲惨遭遇，反映了旧社会婚姻制度个勿合理，搭仔受害人对迭个制度个憎恨搭反抗。《阿必大》一共拢总有3个版本，自然搭上海闲话有关。

　　伊有两个公开版本，分别垃拉1957年搭1979年出版。照理讲，前头出版个应该更多地保留语言原貌，但情况并勿是迭能。最先由上海文化出版社出版个《阿必大回娘家》，搭仔后头由上海文艺出版社出版个《阿必大》，侪是删节过个整理本，也侪是文牧整理个，内容浪向倒相差勿是老大，差别大拉语言使用浪向。前者把蛮有地方特色个语言，整理辰光朝普通话靠拢，有个改成普通话词语，有个索性删脱了。如拿“猪猡”改成“猪”，“懒朴”改成“懒惰”、拿岁数“活在狗身上”改成“长在狗身上”等等，意思呒没变，但拉读唱辰光，因勿是“土语原话”，勿仅特有个韵味呒没了，还总有一种勿服帖个感觉，而1979的版本倒保留仔邪气多个特色方言词语。

　　《阿必大》还有个内部版本，就是1959年1月由上海文艺出版社编入《传统剧目汇编》后出版个。同上头两个版本相比，迭个版本保留比较多个历史原貌，是个勿可多得个本子。因为是内部出版物，从“汇编”当中其他剧本印数有个仅几百册来看，当年印数也勿多，现在珍贵了。搿本《阿必大》所以值得上海方言研究者重视，原因一是里向内容比前头两个版本多仔交关。《阿必大》原本是一个多场次个中型剧目，迭个版本更接近于原始面貌，因为伊本来就是解放前个演出记录本。剧本老能反映当时个风俗特点，人际关系，语言面貌等等。就像是旅游时到仔一个充满着野趣个景点一样，让侬有眼睛一亮个感觉。二是因是舞台记录本，伊记录个侪是艺人演出时个各种口语，甚至骂人也侪用土语，客观浪保留仔大量当年行用个方言口语资料。比方雌老虎一上场自我介绍，有一段唱词形容伊个儿子人矮辰光，用仔“养死养煞养勿大”、“矮勃疏”、“一尺三寸长衫着地拖”等，迭些词句至今垃拉上海西南原松江府方言中常用。随着剧情发展，婶娘同雌老虎斗智斗勇，两个人之间个对白或唱词，全用方言，用词丰富，充满谐趣，邪气好个表现了两个人勿同性格特点。三是从书中语言看，当时个演员虽侪是上海城里人，但伊拉个说白念唱，其口音及表述都还保留着老派方言个特点，邪气“土”，更像现在个上海西南方言即原松江府方言，迭个倒也符合松江方言是上海方言之根个历史记载，勿像现在个上海话，正勿断抛弃老派方言而成仔区别身份个城里人语言。

　　清代苏州人钱德苍编过一部《缀白裘》，也是舞台演出记录本，因里向保留仔大量吴方言语料，现在成仔研究当时语言极可宝贵个资料。所以讲，从上海方言研究角度讲，各个版本个《阿必大》值得重视，值得研究，当然侪值得收藏。