侬相信？几句上海闲话能够拿一个“差生”变好，勿相信？葛末我来讲拨侬听听。

　　记得有年新学期开始，我担任初二个语文课兼班主任。班里分来了个留级生。所有班主任邪气担心留级生，因为老难带个。留级原因复杂，成绩差是关键。一只班级只要一个留级生就够了，班主任顶顶头大。

　　开学第一天，我看有个长一码大一码个男小囡，背垃老大一只书包，立垃拉二【ni】楼大厅里。伊勿进自己教室，抬起头朝三楼看，三楼是初三个班级。伊一面孔迷茫，老难过个样子。初三老师走过辰光，偷偷告诉我：“迭个学生子原来成绩勿错，神志无知一日到夜打游戏机，几门课勿及格，是留到侬班里个。我走到伊旁边，刚想开国语。突然想，勿如用上海闲话讲，比较随便。我拍拍伊肩架，讲：“哎唷，姚民啊！”

　　伊一呆【nge】，朝我看看。

　　“侬介结棍啊，打篮球一定老灵光!”

　　果然，伊面孔放松交关。我马上又跟上一句：听?老师讲侬作文写得老灵个，暑假作业侬个几篇作文真个老灵光啊。“我看伊开始对我有一眼眼好感，马上接牢讲：“侬来看自家老早个同学上三楼？有啥看头啦！呒没事体啦！阿拉从头开始，侬绝对可以学得比啥人侪要好。迭样，我拿侬带进教室，介绍拨同学个辰光，就讲侬是转学来个新同学，侬看哪能？”伊眼眶慢慢交变红，偷偷瞄了我一眼。

　　我拿伊带进教室，讲：“阿拉鼓掌欢迎新转来个同学！他是校篮球队个呀！”

　　全班热烈个掌声让迭个高个子男孩老意外，我眼睛个余光瞟到伊感激个眼神。

　　迭个之后，我好几次朗读推荐伊写个周记搭作文。再之后伊个语文成绩每次大小考试侪勿低于80分，垃拉班里名列前茅。接下来伊认得了几个喜欢打篮球个同学，下课就去篮球场，又成了一名快乐个大男孩。最终，伊变得老好，成为一名合格个毕业生。毕业照里，伊立拉最后一排，笑眯眯，老神气个。

　　上海闲话，让我跟学生个距离一下子变小。让一个自暴自弃个小囡变好。今朝我垃拉想，假使我开始用字正腔圆个普通闲话搭伊谈话，乖乖，大概会吓脱伊半条性命！真个想勿到，沪语个力道介足，居然让一个已经灰心丧气个学生，重新唤起对生活美好个追求，扬起了生活格风帆！沪语魅力勿可小觑哦！难怪哦，现在沪语又风靡上海滩！