刚刚学到迭个“弄”字个辰光，总认为是先人造字个辰光漏脱了一个边旁，因为上海闲话里个“弄”，常常需要用手来实现，所以应该加上一个提手旁。后来翻开《现代汉语词典》，再晓得是自家知识浅薄，随意想象。因为“弄”字还有一个读法念【1ong】，是小巷、胡同、弄堂个意思。但阿拉上海话里个“弄”常常是读作【nong】个，而且迭个字勒垃上海话里是老普遍个，也蛮常用个，动勿动就来个“弄”，甚至常常从小“弄”到大。

　　小辰光，刚刚学会走路，常常会得掼跤，爷娘总归边扶小人边问：“弄痛了 ？”再大一眼，大家开始顽

　　皮，身浪向常常白相得老龌龊个，迭个辰光爷娘总会讲：“看看侬，身浪向弄得来一天世界，像只野鬼【ju】。”迭个大概就是阿拉最早接触个“弄”字个意义。

　　后来阿拉稍稍长大了一眼，发现阿拉上海话里个迭个“弄”字实在是太伟大了，几乎随便啥个物事侪可以“弄”一记。记得老早子上小学，爷娘每天老是对阿拉讲搿句闲话：“放学以后勿要忘记脱弄一篮羊草。”（乡下头用来喂羊个生活）乃末“弄羊草”成了阿拉搿一代人一件必做个生活。读初中个辰光，有一眼懂事体了，身浪向开始要干净讲卫生了，为了巴望过年个辰光爷娘能够帮忙“弄”一件新衣裳，天天放学回到屋里向“弄夜饭”，好让爷娘回到屋里向能早点吃夜饭，还望爷娘能夸上一句好话。

　　毕业后，呆垃屋里向，爷娘总会讲：“想法弄点啥个生活做做，蹲垃屋里向哪能弄法，长大仔看侬啥地方弄娘子去。”看看，连讨老婆也叫作“弄娘子”，“弄”字个广度可见一斑。

　　我从小生长勒垃崇明，勒垃上一辈人个熏陶下，阿拉也经常演绎“弄”字人生。乡下头每年有农忙，阿拉碰到熟人总会问：“忙头弄好了 ？”意思是农忙做完了 ？积蓄了几年个

　　钞票，农家纷纷开始造楼房，相互间总是会问：“房子弄好了 ？”“弄得差勿多

　　了。”对方往往也会用“弄”字回答侬。人到中年，子女也长大成人了，碰到交关辰光勿见个老熟人常会问起：“小囡工作弄着了 ？”我

　　讲：“弄是弄着了。”“葛末弄得着几钿一个号头？”“弄勿着几化。”侬看看，一段普普通通个对话，有多少“弄”字贯穿勒垃其中。

　　前两日，邻居买了一辆汽车，阿拉跑过去劈头就讲：“哟，弄了一部车子啦！”“最近想出去跑跑生意。”邻居答。“弄仔车子侬要开始忙了。”“勿忙勿忙，勿像侬，养了个小孙囡倒真个忙交关。”“也就是每天弄点伊拉吃吃。”就算邻里搭讪，也免不了几个“弄”字。

　　夜到头回到屋里，老两口对话也常常“弄来弄去”。我有看书读报个习惯，老婆常常埋怨道：“看看侬搿张床浪向，铺天泼地侪是书呀报纸个，弄得来像啥个样子。”我讲：“我抓紧弄好伊。”“看看侬，年纪勿大，头发弄得来乱糟糟也勿弄弄好，胡子也勿弄来刮刮干净，弄得来像个邋遢老头子。”吾讲：“老婆哟，侬看我啥地方有辰光弄搿两根头发咾胡子，侬就让我定定心心多看一歇书好了。”老婆道：“一日到夜看书看书，我看侬总归弄勿出啥个名堂来啊。”

　　一个“弄”字贯穿了阿拉个一生，实在是太奇妙太令人感叹了。

　　编者按:真像名词有“代名词(如:我、侬)”一样，动词也有“代动词”，上海话当中“弄”就是一个“代动词”，像“弄只西瓜来吃吃”，“去弄张碟片来看看”。勒不需要寻明确个动词辰光用，讲起闲话来方便得多，普通话个“搞”字也是代动词。