现在个银行储蓄所交关有气派，大理石地面，现代化业务操作设备，客户还可坐勒垃柜台前办理存取款手续。侬晓得老早子个银行储蓄所是哪能样子个 ？当时个银行办理业务就是“一把算盘一支笔，一二三四五六七”。但是操作交关严谨，假使有一分钞票个差错，哪怕勿吃饭查到深夜也要查出来，所以银行有“铁算盘”之称。 

　　我1963年进银行工作，开始学储蓄业务，分配到虹口区天宝路一家人民银行小储蓄所上班。当时办理储蓄、信贷业务侪是人民银行一家。迭个储蓄所只有两位年长个营业员，一位办理经办，一位办理复核兼出纳。储蓄所约十多平方米，2米长个木柜台，柜台外面摆一个木头做个靠背长椅供客户休息。天冷用一条棉帘挂勒门口挡风保暖，天热当然呒没空调，为了勿拨风吹脱办理业务个传票，一只摇头台式电风扇放垃地浪只能吹脚。银行个安全保卫设备也老简陋个，除脱装了一个警铃外，柜台边浪摆一根木棍，柜台里面还摆了一瓶红墨水搭一只放石灰个小木盒子，万一碰到歹徒就按警铃，并先拿红墨水搭石灰掼到歹徒个面孔浪。 

　　客户来办理存取款，先要填好凭条，然后拿存折和凭条交拨营业员，营业员拨伊一个号码铜牌，等勒海叫号。银行营业员先按存折号找相应个账卡。拿活期储蓄账卡一叠叠放了转盘箱格里向，转起来便于寻找。账卡浪贴着五颜六色个“耳朵”，颜色都表示不同号码数，账卡浪缺口也表示不同号码数。抽出了账卡，就勒客户存折跟银行内部账卡浪进行记账，然后传拨复核员。 

　　讲到吃饭，搿个辰光当然呒没盒饭送个，也呒没食堂。侪是自家带来个。稍大一点个储蓄所就自家每日天生煤球风炉蒸热饭菜，像我迭个储蓄所只有3人，就出点钞票到隔壁居民屋里请伊拉相帮代蒸一蒸。当时银行个环境、设备确实是比较艰苦个。想想真勿容易啊。