1946年到1956年，我垃拉 顺昌路（南端）到底个信陵邨生活过十年。搿个是条平面呈“乍”字形个旧上海石库门弄堂，搭北面个天祥里、西面个恒庆里以及几条小弄堂组成一个由顺昌路、黄陂南路、永年路搭徐家汇路合围个街区方块。除了沿顺昌路一排店铺跟永年路菜场外，信陵邨里也老闹猛个，有私人医生诊所，有袜厂，有小学咾啥，拿现在个标准看是有点简陋，但样煞侪有。路南个一家药材店还展出过我平生第一次看见个大老虎，搿个地方就是我小辰光个“世界”。

　　1949年搭1950年之交个搿年冬天介有眼冷。我爸爸下班回来，吃好夜饭就忙拉剪纸条、调浆糊，张罗往玻璃窗浪贴“米”字形个“花样”；我姆妈还垃拉缝一只蓝布套，讲是要罩拉灯泡浪向个。我唔奶冰冷个手垃拉旁浪“轧闹猛”。乃末就听到邪气刺耳朵个警报声拉响了，一栋楼个人侪迓到灶披间后个楼梯角落头，轧得成了一坨。一歇歇，讲是警报解除了，乃末大家再回屋里睏觉。像迭能介躲过两三趟。一日早浪向我醒过来，望窗头外往下看，支弄里靠对面一边墙根浪，摆放了一溜白布裹着个担架，阴霾个天气、空无一人个弄堂，透着丝丝寒意。后来我再晓得，那一溜全部是同胞个尸体。搿天是“2·6”轰炸个翌日——2月7日。阿拉信陵邨西隔壁恒庆里南弄口正面对局门路，立垃埃搭能看到“海威寺火葬场”个大烟囱竖得老高老高。1950年2月6日，国民党个飞机垃拉西面个卢家湾掼了炸弹，炸死了勿少老百姓。“海威寺”来勿及处理介许多尸体，停放拉马路边浪勿来三，只好停到支弄来。想想阿拉搿代人还算幸运个，生拉旧社会，长拉红旗下，六十多年呒没碰上过大个战争，搿一天搿一次是我一生当中唯一个一次直面战争个一天。

　　三十年后，我又有机会到信陵邨上班两年多。弄堂还是迭能介个弄堂，只不过少了老早地个喧嚣，多了鼎沸个人声。特别是看到当年为我打针个端庄优雅个洪师母，现在已经变成一个佝偻苟且个老太太，真感叹岁月无情，须正视造化弄人，爱生护生。