有一年过年我到一老朋友屋里白相,碰巧碰到了王双庆,朋友还请我一道吃饭唻。我是兴奋了勿得了。侬想阿拉一个普通人搭一个老有名、老搞笑个滑稽演员一道吃饭会得勿兴奋。王双庆是阿拉爷娘辈个,但伊一点呒没架子,勿倚老卖老,老热情个,阿拉一歇歇就熟了,搭伊交上了朋友。
我告朋友坐辣一道听王双庆讲笑话,伊讲伊只要有粥吃,有辣货、大蒜吃就老开心了。伊还讲,今朝出来换了两部公交,车浪有交关人认得伊,人家问哪能不坐轿车啦,伊告人家讲伊也是老百姓呀,坐公交个大多数侪坐得起轿车个呀!哪能侪不坐啦?搿一问,车厢里乘客侪笑了起来。
王双庆对自家蛮小气,对人家倒大方。一趟,我脱朋友到伊拉屋里去坐坐,伊硬劲要阿拉到饭店吃饭,吃好了硬劲要埋单,还讲埋单总归男人买个咾。
王双庆文章也写得老好,介大年纪还出了本《私房积噱》,收了一只只搞笑个小故事。伊拿书送拨阿拉,扉页还写了四句话:“出书出洋相,实在勿像样,随便侬翻翻,看看白相相。”侬讲伊谦虚。
去年,传来消息讲王双庆生重病了,阿拉大吃一惊,介乐观个人哪能会啦?阿拉搭朋友去医院看伊,本想伊生重病肯定不会笑了,呒没想到伊还是对阿拉满面孔笑容,问买点啥拨伊吃吃,伊讲伊不吃补品个,其实伊怕阿拉破费。阿拉陪伊一道讲讲笑笑,心里相老难过个,盼望伊毛病好。后来又再去看伊,已经老痩了。去年底伊走了,走了介快哦。伊曾经拨观众、朋友带来过数勿清个快乐,阿拉老想念伊个,真正怀念伊。