生活用水，从阿拉个老祖宗开始，就是用河水、湖水、井水和山泉水。后来西方技术进来了，城里人先用上了自来水。自来水搿种介个叫法，我以为是开始于上海滩。辣上海闲话里，与自来水可以对应起来个是自来火。自来火，火柴。外国人最早带进中国个火柴，上海人称之为洋火。洋火一擦就烧起来了，便当轻松，就叫伊自来火了。就是到了现在，上海人辣平常日脚里还是称火柴为自来火。用上海闲话来讲火柴，实在拗口得很，听勿到个。而自来水个称谓就是搭了自来火个便车来个。

　　放一壶自来水，烧开，就是开水了。冷开水、热开水、温开水，大家侪吃自来水。卅年前，市面上出现了净水器。辣净水器面前，自来水档子一记头跌下去了。于是各家各户有点条件侪装上了净水器。申花足球队最早起家个老板就是做净水器生意个。申花净水器一度大名鼎鼎。把净水器轧出大家生活个是饮水机。饮水机有冷热两只龙头，方便。饮水机用个是专用饮水筒，号称筒里装个是比自来水更干净、更纯洁个饮用水。饮水机从写字间里发迹，后来被请进了千家万户。到亲戚朋友屋里向做客人，不再用热水瓶了，大家放饮水机泡茶吃水，是一时个时髦。辣桶装水之后又涌出了瓶装水。瓶装水更加便当了。开会辰光人手一瓶，不必上茶添水了。乘车、赶路也可以一瓶在手，避免舌燥口干之苦。瓶装水个牌子、花头更是多得叫人一头雾水。

　　当吃个水变成一种生意经了，就会有黑了良心个商家一门心思要从水里榨出油水来。最先个消息是桶装水个筒辣消毒浪拆烂糊了。以后是筒里向灌个水也就弄成了普通自来水。专家们还提醒，桶装水如果不三日两头用光伊，会滋生出交交关关细菌个。最近个新闻是一些瓶装水个检测也是马马虎虎个，质量要求还比勿过自来水。有关个报告讲，自来水个国家检测要有一百多项，要比交关桶装水、瓶装水个质地弹硬得多。吃自来水、吃烧开滚过个自来水最安全。

　　吃水，吃啥个水结果是兜了一只圈子。从自来水开始，冲进净水器，流过饮水机，灌入瓶装水，最后还是回到自来水。我是因为偷懒而勿欢喜赶时髦个人。由此几十年来辣屋里向一直是冲一吊子水用铜吊来烧自来水个。水开了，再滚上伊一两分钟。再冲进热水瓶、冷水壶。就是我个九十几岁个老娘亲一早起来，也关照我：“烧两吊水，换脱热水瓶里个隔夜水！”与几个也烧自来水个老邻居谈到水，伊拉讲：“还是相信政府、相信自来水厂，一辈子吃伊拉个自来水……”