“噱头”个“噱”字，本身蛮噱个，伊有得轻描淡写个冷面滑稽，一针见血个千钧之力，搭勿着界个相反用法。眯花眼笑是笑段子出噱，老噱个；火气老大是有人“豁胖”摆噱头骗人害人；翘大指拇头是爷叔有情有义有本事，做出来个事体有噱头。真是笑也噱头，恨也噱头，坏也噱头，好也噱头，噱头势里向腔势多。

　　一是笑对“乐腔” 滑稽来死个闲话、表情、动作，会得惹人发笑，文艺表演有笑料、有笑点，演艺界个行话叫“出噱”，笑来闹猛笑得多个，观众讲是“噱头势多”。连得笑星王汝刚也称赞，程十发先生特别会得说笑话，伊“不得不承认十发先生比我噱”。

　　二是讽刺“花腔” 有个人花头花脑，欢喜卖样，嘴上讲来花好稻好，底子里向一包稻草，葛末搿种介人是垃“噱头噱脑”；还有个人无中生有瞎三话四，添油加酱夸大其词，尽管想拿人家花得来眼花缭乱，但是明眼人一看就晓得不过是“噱头”而已，因为伊花得来过头了；再有经常看到个买一送二，买一只几千元个高价锅子，送两只小调羹搿类商业促销个花样经，也常常被称作是“生意浪个噱头”。 

　　三是拆穿“装腔” 有眼人欢喜乱开玩笑，像煞有介事个吓人家、骗人家、白相【逗弄】人家，等到人家屏勿牢反应激烈个辰光，马上笑眯眯个自拆西洋镜，讲认错、道歉两个字又呒没面子，就讲搿个是打朋个，是假佯头搭侬“摆噱头”。

　　四是借用“洋腔” 也有人研究讲噱头是英文shit个谐音，英文里个shit有得胡说八道、哗众取宠、引人发笑咾啥个意思，老早仔作为十里洋场个上海，拿过来像沙发、水门汀一样个用开来，洋人华人侪懂得是啥意思。

　　五是包容“怪腔” 上海人见多识广，勿会责怪标新立异，见怪勿怪，为人海派。以前有得“噱头噱头，噱垃头浪”个讲法，有得欢喜拿噱功做垃头浪个人，伊拉讲究发型，奶油大包头做勒刷刷势亮【特别闪亮】，就是想听别人讲一句：“搿只飞机头噱头势足个”；碰着勿大寻常、蛮有特色、新奇有趣、蛮好白相个事体告【和】物事,上海人也会得用一个“噱”字来点评：“电影《美人鱼》蛮噱个，角色有眼痴头怪脑个，哪能看个人还介许多”。还有“老娘舅蛮噱个，伊拉一车子老人乘大巴士旅游，车子突然急刹车，有三四个老人跌倒，车浪老年人竟然会得勿约而同个高声朗叫‘吓坏了宝宝’，还拍拍胸口，像是小囝！喏，搿个是伊个微信，侬看看叫，噱？”

　　六是冷对“贼腔” 对有个油头滑脑、油腔滑调、油嘴滑舌，贼腔兮兮个银样蜡枪头，一句“滥摆噱头”，搿排【这种】小贼就勿敢响了。对动歪脑筋出歪点子“忽悠”别人个小蟊贼或者大骗子，上海人是心存警惕，恨之入骨，横眉冷对个。前两年报纸浪登过“留学中介花头多，小心被‘噱’进”个报道，戳穿贼骨头个噱头势把戏，提醒善良个市民捂牢皮夹子，当心拨坏人噱脱钞票。

　　七是买账“像腔” 像腔就是像样子、就是现在讲个“有腔调”、就是有板有眼、就是生活做得漂亮、就是成功、就是赞唻勿得了。对有本事、有高招个各路英才，上海人会得心服口服个服帖伊：“屠呦呦老有噱头个，拿了一只诺贝尔奖，总理个政府工作报告也专门表扬伊唻！”“城隍庙灯会办勒有噱头！人山人海，仍旧平平安安，一眼也呒没出事故！”

　　真是噱头势里腔势多，噱头势里花头大。一个“噱”字，交关意思。噱字集中了上海闲话幽默风趣个特点，讲出了上海闲话活泼多彩个别致，体现了上海闲话正话笑讲个聪敏，话出了上海闲话简约含蓄个风采。