以前上海个公共汽车站侪呒没候车亭，伏天热中心里太阳热豁豁，迭个辰光如果候车，侬就会尽量寻个有阴凉头个地方迓一迓，因此就出现了搿张照片水泥电线杆阴影后“一路纵队”个情形；要是候车碰着落阵头雨，侬也会豪燥找个好遮雨个地方避一避，当然多数是寻勿着，只好挺落勿动气；上了岁数个老年乘客勿是高峰个时段候车，候仔半半六十日车子还呒没来，想坐下来歇歇但呒没地方拨侬坐，吃勿消，要么覅怕龌龊难看直接坐上街沿……现在公共汽车站侪有了遮阳挡雨个候车亭，有座位可供候车人小坐，前面提到个老早候车辰光个问题侪解决得干干净净。看看时下美观、现代化个候车亭，再回转去想想老早个汽车站，老早个汽车站恐怕只好叫伊“赤膊”车站了。 种楠 摄 林庸 文