上海人对结交朋友称为轧道，对结交异性朋友称为轧朋友。轧道，同一条道上跑个车，讲个是志同道合。轧朋友，多半是指年轻人个谈恋爱。轧朋友个终点就是结婚成家、生儿育女。轧朋友轧勿到搿样一个终点站个话，大家就分手，从此勿相往来。还能有热络来往个，还会有亲亲热热个，会拨人家怀疑为轧姘头。老底仔就是搿样子保守个。现在小青年时兴个男闺蜜、女闺蜜放到廿年、卅年前去，是勿作兴个事体。做丈夫个有女闺蜜，做老婆个有男闺蜜，昏头了，侬敢！小朋友一路长大成人，听到爷娘最最多个教育是：“轧道一定要轧好道，一定勿能轧坏道。轧了坏道拨坏人带坏脱，要去吃官司个！”交关上海人家个爷娘常常是会怀疑一切个，自家个小囡是好小囡，人家个小囡是坏小囡。因此阿拉小辰光是老怕去同学个屋里向，担心一勿小心就被打成坏小囡，就此失去一个要好个同伴。

　　上海闲话里形容好朋友为老交。老交即是深交。勿是新朋友，是结交了老长一段辰光个旧朋友，是出窠兄弟，是割头朋友。大人、老人逗邻居隔壁个小小囡白相，会讲：“阿拉搭侬是老交了。是？老交！”比老交还差上一个档次个朋友，上海人称为搭档。南方人叫做拍档。搭档并勿是一定指合作共事个朋友，有相同个兴趣爱好、一道去白相消遣个朋友是称为老搭档、老搭子。早上练身体个朋友、日里打牌搓麻将个朋友、夜里跳个场舞个朋友都算辣搭档、搭子里。可以发展为搭档个称有搭头、呒没发展前途个称呒搭头。串通一气搭子就称为连裆、连裆码子。搿样个称呼除了开开玩笑外，是有贬意个。要慎用搿样个介绍。

　　上海闲话里还有佮伙一讲。佮伙，顾名思义，合伙是也。佮个读音与葛相近。佮伙常常是指合在一道用伙食。过集体生活，几个好朋友饭钿菜钿合辣一起开伙仓。有福同享，有苦同当。大家一道吃饭，大家一道挨饿。佮伙还引申出来为联手输赢、比肩进退个意思。棋牌室里有发现一道佮伙个暗搭子，就会勿欢而散，甚至相骂、动拳头。明个佮伙表明精诚团结。暗个佮伙暴露人品低下，很坍台个。上海人讲究情面，对摆勿上台面个佮伙勿一定当面拆穿于众。惹勿起，躲得起。大家心知肚明，点到为止。上海人轧朋友讲究桥归桥、路归路，是清汤面。对烂糊糟糟个人来讲，必定是呒没几个老交个朋友个。看人头识人，看伊个轧道就晓得了。