上海人打交道个辰光，经常能够听到“一句闲话”。搿么迭句“一句闲话”到底是啥意思呢？其实，真要解释起来，搿里向花头经阿是蛮透个。

　　第一种意思是讲一个人做起人家托伊做个事体来邪起爽气。

　　第二种意思是讲一个人急于要人家帮伊做到某样事体，于是就要求对方“侬现在就摆‘一句闲话’了搿嗒！”——好像辣辣下最后通牒。

　　第三种意思是讲一个人为了显示强势，为了要别人侪顺牢伊，伊就会粗声粗气朝人家讲：“我现在就摆‘一句闲话’了搿嗒”——好像一口要倷人家吃脱一样。

　　第四种意思是显示一个人邪气有本事，比如讲有人碰到难办个事体，伊就会讲：“我只要一句闲话，侬就会哪能……哪能……”——一副做老大个派头。

　　第五种个意思是显出自己勿是“好吃吃个”。

　　闲话讲到搿嗒，据说迭句“一句闲话”还是旧上海流氓头子杜月笙个口头禅。大家侪晓得，当年杜月笙辣辣上海滩浪向相当有势力，勿管大麻烦小麻烦，伊只要表态“一句闲话”，就基本浪向可以解决麻烦。天长日久，耳濡目染，伊手下头做事体个徒子徒孙也就有了一句口头禅：“大哥，只要侬叫鞭（哨子）一吹，阿拉随叫随到。”搿里厢个“吹叫鞭”就是“摆一句闲话”个翻版。

　　但闲话讲转来，“一句闲话”勿管侬有多少种解释，里向个最终结果侪是一样个，侪是要达到“立竿见影”个效果。