上个礼拜六从浦东源深体育场办完事体后，想乘车回去，却辣辣木知木角中走到了摆渡口，像鬼使神差一样。

　　上世纪80年代中期，我结婚辰光房子借辣辣浦东上南路，伊个辰光因为厂辣辣沪东，所以每天上下班来回，乘摆渡船是一条必经之路，呒没第二条路。伊个辰光船舱里向人声邪气嘈杂，而且脚踏车也夹了当中，像沙丁鱼罐头一样轧得不得了，船舱里交关人吃香烟，搞得烟雾腾腾，空气一塌糊涂，朝地浪向看，香烟屁股、废纸头到处侪是。

　　自从搬回到浦西，我已经廿几年呒没乘过摆渡船了。特别是最近几年，天上（大桥）、地下（隧道）公交纵横交错，随便到啥地方侪便当。勿晓得现在乘摆渡船个人多勿多，是勿是还像老底子一样？

　　刚刚一上船，马上就感觉到；老底子不好跟现在比了，现在船舱里向宽敞明亮，空气清爽，稀稀拉拉只有几十个乘客，地浪向清爽得勿得了，不要讲香烟屁股，废纸头也呒没一张。

　　迭个辰光一个四十多岁中年工作人员走到船边，手一抖一收，系在码头上个缆绳就收了回来。摆渡船鸣笛起航，缓缓驶向对岸。乘客们要么三五个熟人在聊天，要么在用手机听歌看片，船舱里秩序井然。

　　伊个工作人员把缆绳挂起，脱脱工作手套，走到一个看书个女乘客旁边，轻声问道：“同志，勿好意思，打扰侬一歇歇，请问，侬上岸后是勿是到公平路乘25路电车？”那个女同志笑了笑回答：“勿好意思，伲勿去额。”另一个胸前别着校徽个大学生也回答道：“伲乘13路电车”。随后，迭个工作人员又继续朝前走，去问其他乘客，大家发现迭个情况，侪老奇怪个看伊。

　　迭个辰光辣辣驾驶室旁边个座位浪向，立起来一个七十多岁个老阿奶，伊左手拎一大包土产，右手撑拐杖，对迭个工作人员讲：“谢谢侬同志，勿要再麻烦大家了，等一歇麻烦侬帮忙画一张草图就可以了。”

　　“阿奶，渡口离25路站头还有老长一段路，侬腿脚不好，走勿得长路，还是跟船乘回去，可能下一趟船浪向就有人乘25路电车，可以帮忙送侬过去。假使实在呒没人，迭趟船开回去，再有两个来回，我就下班了，我陪侬去。”

　　迭个辰光，大家才明白原来迭个同志想寻人帮忙送送腿脚不便个老阿奶。好几个乘客侪异口同声地讲：“同志，阿拉要乘25路电车，阿拉陪阿奶去。”看到介许多陌生人侪愿意帮忙，阿奶放下包，激动得双手作揖连连致谢，哽咽着讲不出闲话……