要当好一名煮妇不简单，特别是辣辣三年经济困难时期，大家收入侪不高，市场浪向供应也严重不足，搿种情况之下要让家人吃饱又吃好，每一家煮妇侪必须精打细算。

　　鸡蛋是当时饭桌上最常见个荤菜，阿婆心疼我和弟弟长身体，中午会煎两只荷包蛋，戏称“太阳蛋”。俗话讲：“天无二日”，勿过阿拉屋里向个“太阳”一直是两只。即使全家人一道吃晚饭，作为“太阳”个荷包蛋始终只有两只，归我和弟弟享用。

　　煎好蛋之后，镬子里还有一点油花，阿婆加点酱油，加点绿叶菜，就是一道汤，戏称“太阳汤”。“太阳汤”里有碧绿生青个菜叶，有香喷喷个油花，深得全家人个欢喜。对我来讲，搿只“太阳汤”就是经典，即使到了现在，我还是经常会亲自动手做搿能一道汤——荷包蛋菜汤，只勿过当年个美味现在只是一道最普通不过个家常菜了。

　　阿婆还有一道拿手菜，叫“蟹粉炒蛋”，记忆里搿道菜只有屋里来了客人才能尝到。其实，搿道菜里是一点蟹也呒没嗰，只是辣炒鸡蛋里加了醋、糖和生姜末，另外还有一点切成碎末个胡萝卜和黑木耳，看起来有点像蟹黄。

　　摆到现在来讲，搿绝对可以算是“假冒伪劣”了，但当年真个感觉吃出了大闸蟹个味道。现在有辰光到饭店点菜，我也经常会点一只“蟹粉炒蛋”，搿只菜里是真个有蟹粉嗰，只是再也吃不出当年个味道了。

　　当年肉是凭票供应嗰，本帮名菜“外婆红烧肉”阿拉上海人一年也难得吃一趟，而且一定还要添加交关辅料，常见个辅料包括百叶结、豆腐干、梅干菜等，有时还会拿春季青菜个外叶（现在一般侪是厾脱嗰）放辣盐水里汆过，晾干后做成菜干，烧肉时加一点。红烧肉个肉香侪被搿点辅料“骗”走了，结果往往是“辅料吃出肉味道”，有人就是专门欢喜吃红烧肉里个百叶结和豆腐干，对肉反而不感兴趣了。

　　平时做成肉菜，肉一般侪会被斩成肉丝、肉末。记忆里冬季个“烂糊肉丝”是最受欢迎嗰，二两肉和半颗大白菜一道炖，带汤带水，有荤有素，是阿拉小辰光最常见个盖浇饭。蘑菇能够提鲜，勿过当年阿婆是不舍得买嗰，有辰光碰巧买到蘑菇根，就会加进烂糊肉丝里，全家人侪吃得眯花眼笑。

　　现在天气一冷，食堂里就经常供应烂糊肉丝，我每次看到总归是要买一份嗰。

　　除脱“烂糊肉丝”，“蚂蚁上树”也是我个最欢喜个小菜。其中“蚂蚁”其实就是剁碎个肉末，而“树”则是粉条，所以“蚂蚁上树”其实就是“肉末粉条”，当年阿婆烧个“蚂蚁上树”里树多得像森林，但蚂蚁只有三两只，却可以“骗”我吃下两碗饭，之后还要期待阿婆再让“蚂蚁”爬次树。

　　如果到了逢年过节等肉菜供应比较丰富个辰光，“红烧狮子头”绝对可以算是“硬菜”。只是为了让家里每个人侪可以分到一只，肉末里面一定要加生粉嗰，这样一来，肉圆咬上去松松垮垮，呒没啥嚼劲，我情愿舍肉喝汤，红汤拌饭我还是爱的。

　　有了肉末，放入青菜，就可以做阿拉上海人欢喜吃个菜肉馄饨了。石库门一家包馄饨，家家有分享，一份快乐大家分享就是N份快乐，搿也是从小石库门教会我个人生道理。

　　特殊时期个“大兴菜”是一种无奈，里面透露出来嗰是巧妇们个智慧。到了现在，市场里食材供应极大丰富，可以讲应有尽有，但是要想让一家人侪吃得健康，仍旧要考验阿拉“掌勺人”个智慧。