上世纪50年代，有一个叫阿根个老宁波经常来阿拉弄堂推销伊自制搿盐炒豆。“三北盐炒豆——”带有上海口音搿宁波腔，一旦辣弄堂里响起来，阿拉搿帮小八拉子侪会蜂拥而来，用零用钿买盐炒豆，又松又脆，还带点奶油香，味道交关崭。

　　或许是因为生意太好了，后来老宁波就开始出花样，搞摸彩游戏。伊有一只厚帆布书包，里向放满竹牌，上面写有“将、士、象、车、马、炮、卒”等字，一分洋钿摸一趟。摸到“卒”，3粒盐炒豆，摸到“马、炮”可以拿5粒，摸到“车”10粒，摸到“士、象”20粒，摸到“将”30粒，假使摸到“斯大林”、“列宁”，分别可以拿到50粒和100粒。一开始，大家侪觉得有趣，所以一听见小囡叫“老宁波来了”，屋里大人侪会拿几张分币，让伊拉去试试运道。

　　勿过，无论哪家小囡，运道侪勿会忒好，大多数摸到嗰侪是卒，很少摸到马炮，更勿要讲车、士、象了。有一天，几个小囡围牢阿根起哄，讲伊是骗子，书包里根本没有士、象、将等“大牌”。老宁波听了，不慌不忙从书包里摸出写有士、象、将等字个竹牌，然后讲：“看到口伐？那搿点小鬼头手气蹩脚，摸不到不要怪我个竹牌！”搿能一来，小囡侪服帖了，不再吵闹，只怪自家运道不好。

　　弄堂里有个小囡叫阿毛，脑子活络，特别会白相。小辰光，我跟伊一道刮香烟牌子、打弹子、滚铁圈、踩高跷，白相得昏天黑地。至于掷骰子、打扑克、搓麻将、斗赚绩，阿毛样样精通。比如白相纸头做搿“斗田鸡”游戏，伊就用画报纸做成正反两面一样，结果勿论别人哪能吹，伊个“田鸡”侪不翻身，只会赢不会输。真正是人小花头浓，胆小吃大葱。

　　阿毛一直怀疑老宁波书包里向有花头。有一趟，趁老宁波勿注意，伊拿手伸进书包里一阵乱摸，终于被伊发现秘密。原来，搿只书包里有两层，下面一层有交关小袋，里向塞满写有士、象、将等“大牌”；隔一层厚帆布搿上面，则放满兵、卒跟少量马、炮。小朋友去摸，只能摸到上面一层；如果侬怀疑伊，伊就会从夹层里摸出一张张大牌来，弄得侬呒没闲话讲。

　　阿毛拿秘密一揭穿，小朋友侪哄闹起来，围牢老宁波骂，讲伊勿要面孔。老宁波被骂得面孔通红，急急忙忙逃走了。从此以后，老宁波再也不到阿拉弄堂里来了。辰光一长，小朋友侪觉得缺少了点啥，又开始想念起了迭个老宁波，搭仔伊个盐炒豆。于是，大家转而抱怨阿毛，讲侬迭搿小赤佬，真是吃饱饭多管闲事，卖弄小聪明，结果弄得大家交关勿开心。