最近从报纸浪看到，已经有人研究出能够组装家具个机器人，想想真是神奇。勿由让我想起爸爸生前送拨阿拉两兄弟个礼物：每人一只小板凳。迭只小板凳是用硬实木榫卯结构做成嗰，表面涂了一层罩光清漆，看起来匀称而亮丽。一来，伊邪气实用：洗个脚、垫个高或者乘个凉，侪用得着；二来，因为伊体积小，所以放了啥地方侪可以；还因为伊结实耐用，所以几次搬家侪没有舍得厾脱。

　　我爸爸邪气聪明，虽然读书只读到高中，就去做学徒了，但是辣建工系统里，伊已经可以承担土木建筑个设计工作，伊画个二维土建图纸和三维效果图邪气受欢迎。我小辰光就邪气佩服伊个画图能力，也刺激我从小开始欢喜画画。爸爸不但工作浪有一手，辣屋里伊做啥事体侪是像模像样嗰，比如脚踏车，伊可以自家动手拆成零件，然后上油换钢珠自家做保养。为了省钞票，伊准备了不少木工工具，自家做一眼木工生活；小板凳就是伊个杰作之一。从伊自家做个工具箱来看，也同样是用榫卯结构制作嗰，邪气精致。所以每次看到爸爸为阿拉两兄弟做个小板凳，侪会想起伊对工作要精益求精个谆谆教诲。对我来讲，欢喜迭只小板凳不仅因为伊是爸爸亲手制作，更因为伊代表了一种自力更生、丰衣足食个家风传承。

　　受爸爸影响，我小辰光自家动手做过矿石收音机。后来，我用爸爸留下个工具制作过碗橱、圆台面，组装过电视机。成家以后，我还用缝纫机为家人制作衣裤……阿拉搿代人，经历过物资匮乏时期，所以自家动手制作邪气普遍。现在各种智能化个机器越来越多，已经能够部分代替人工，但是无论生活中还是工作中，依靠自家自力更生，奋发图强个精神，勿会也勿应该过时，搿也是新时代崇尚个工匠精神。