最近跟仔一帮画家去舟山沈家门写生。不过，伊拉是写生，阿拉是看写生。

　　因为休渔，码头浪向停满渔船，大大小小，新新旧旧，远远近近排开，猛一看乱哄哄，再仔细看看，船头旗帜浪向写有各家各户个名头，一支支船队，一家家门户，虽然连成一片，但各自为阵，井然有序。

　　画家们一到码头，左看看右看看，眼睛里只有风景了，一歇歇工夫，画架一撮堆一撮堆搁好，调色板浪向个颜料辣辣太阳下头闪闪发光，像断断续续忽隐忽现个彩虹。

　　上半天，有人画大船，抬头挺胸个铁壳船，油漆与铁锈斑斑驳驳，桅杆缆绳牵丝攀藤，阳光下头，光影交错……有人画小船，旧察察里木头船，一半辣辣海水里，一半辣辣泥沙里，木头质感已经被海水撩拨得一点火气也呒没了，缝道道里填充个侪是岁月……

　　画家讲，写生是要讲速度个，要捕捉一小段辰光里光、影、物之间个关系，过脱一歇歇，物事也许还是老样子，但光、影已经勿一样了。

　　下半天，又去码头，咦，有点勿一样了，看到工人辣辣做生活，问伊：刚刚此地几只大船呢？工人手一指：喏！还停了码头浪。只不过退潮了，船落下去了。

　　有趣。上半天下半天，景色居然大变样。

　　想起一个同学讲，写生，也是写生活。对呀，眼门前个风景，转瞬即逝。要捉牢啊！