想到当年自然灾害辰光有一桩事体，叫阿拉兄弟两家头到今朝还邪气个感动。1963年个春节前夕，当年还只有13岁个弟弟，过年呒没件像样一眼个衣裳着。阿拉姆妈硬劲省下几张钞票搭仔几尺布票买了一段蓝布，自家动手搭弟弟做一件过年好着个新衣裳。

　　大年夜，一家门侪已经睏觉了，姆妈一家头辣拉昏黄个15支光电灯下头，搭弟弟裁剪缝纫衣裳。中式对襟个衣裳要挖领圈，前身个领圈挖得深一眼，后身个领圈挖得浅一眼。姆妈日里向忙仔一日了，疲惫不堪个伊一个疏忽拿前后身个衣片折叠起来四层一道剪领圈，乃末好，拿后身个领圈开得搭前身个一样深了！

　　一看衣裳剪坏脱了，伊吓得一身个冷汗。姆妈强打起精神来，细针密线拿后身搿块错剪下来个领圈重新仔仔细细个缝合上去。寒冬不眠夜，慈母手中线。第二天，正好是大年初一，做仔一夜手工生活个姆妈终于辣拉天亮个辰光完成了迭件带有缺陷个新衣裳。当弟弟起床高高兴兴个穿上新衣裳个辰光，阿拉姆妈却病倒了！

　　啥人敢讲，迭是一件残缺个衣裳，辣拉我个心目当中，搿是世界浪向最最漂亮个衣裳，因为辣拉迭件衣裳里向包含着天空一样宽阔、海洋一样深邃个最最伟大个无私个母爱！