勿晓得从啥辰光开始，“上海”前头总归拨人家加了一个“大”字，“大上海”长，“大上海”短。其实，上海闲话里头有交关“小”字头，比方讲“小洋房”、“小花园”、“小悠悠”……还有“搓搓小麻将”、“渳渳【mi】小老酒”、“小乐惠”、“小弄弄”……假使讲，侬拿搿点“小”仅仅理解为物理意义上个体积个大小，搿说明侬个上海闲话还勿够灵光。再打个比方，“小悠悠”除脱应理解为除了体积浪个大小外，更加有一种小巧玲珑、精致适宜个意思垃当中。

　　上海闲话“螺蛳壳里做道场”，活脱活个点出了上海人善用空间搭物质资源个本事。上海人形容出手大方个为人处世为“海派”或者“世海”。同样个，一个“小”字，也现出海派跟世海个魅力。北方有句俚语：包子个口味搭包子个褶纹多少呒没关系。偏偏上海南翔小笼包，就是规定每只包子只能有十八个褶子，多一折或者少一折就是勿正宗个南翔小笼包。可见，上海人对一个“小”字也一点勿马虎。上海开埠近170年，传奇辈出。勿少传奇起步就垃一个“小”字。比如著名个国际饭店，因为地基占地面积老小，却要造一幢远东第一摩天楼，交关设计师侪勿敢接搿只生活，但邬达克就垃拉这块迷你个土地上创造了“远东第一高楼”个奇迹；还有著名个天厨味精厂，1923年是从南市个一幢两开间石库门里向诞生个；此外，陪了阿拉几代上海人个老字号品牌，像414毛巾、白象牌电池、奶油花生牛轧糖咾啥，侪是从弄堂小厂出来，名扬全国。

　　上海人海派，勿管大生意小生意，一样认认真真做。信勿信由侬，上海有家百年老字号腌腊店“北万有全”，火腿一两就可以起售。按行规，一两火腿要切成薄薄个廿八片，迭个绝对考验师傅个刀功，然后拿火腿片像鱼鳞一样整齐个铺排垃油纸浪，包好后再老当心个套垃牛皮纸袋袋里，双手恭敬个递拨客人。伙计绝勿会因为侬只买一两火腿而对侬翻白眼。

　　上海闲话里个“小”，里向有着大道理。倒勿是真个数量个大小，而是一种大大个警示，大上海五光十色个引诱老大，生活指数高，稍微勿当心，破产、坐牢监个事体老有可能发生，难板放松放松是可以个，不过凡事勿好过分，点到为止：三五知己朋友小老酒渳渳是可以个，不过吃得酒水糊涂，酒后驾车就讨厌了；同样个，买彩票搓麻将，小弄弄寻点小刺激是可以个，千万勿要扑上全副身价。勿了解个人讲上海人小气，其实上海人只是小心翼翼个过自家个小日脚。

　　所以讲，阿拉垃拉赞扬海派文化个高度跟深度个同时，请勿要忘记伊个“小”——精度。