我养垃拉上海，今年69岁，爷娘侪是浙江人。十岁前头刚刚回到上海，上海闲话侪听得懂，勿过一句也讲勿来了。人家搭我讲闲话，我羞答答个，勿敢开口。辰光一长，有个人还当我是哑子。

　　我自家心里向也邪气勿开心。哪能办？我一定要拿上海闲话学好！垃拉学堂里，我用心听，学上海老师、上海小朋友讲闲话用个字眼搭仔声、韵、调。伊歇辰光学堂里功课勿多，下了课，我会一介头到人民公园、福州路、外滩去白相，看到路边有唱“小热昏”、测字、算命个，或者做小生意个人，觉得伊拉个上海闲话邪气好听，我也会静静交个听交关辰光。还有夜里向个叫卖声：“栀子花噢白兰花！”“檀香橄榄噢卖橄榄”。就迭能介，勿到半年辰光，我上海闲话就讲得蛮好了。同时，搭来自各省个小朋友接触，也学了勿少各地方言，像苏北闲话、山东闲话咾啥。学好上海闲话，自家有了信心，搭周围个人关系也热络了，假使勿会讲闲话，肯定会影响交流，同学们也勿会选我当小干部。

　　现在阿拉迭个城市里，有交关交关新上海人，伊拉当中勿少人到上海辰光蛮长远了，还勿会讲上海闲话。当然，勿会讲上海闲话，只要讲普通话，也照样可以生活、工作，并呒没特别个问题，存心要学上海闲话，只要认真听、认真学、多开口，勿要怕难为情，并呒没哪能难。

　　从学上海闲话开始，我对学语言也发生了浓浓个兴趣。五十年代中期，国家开始推广普通话，我也学得老认真，埃个辰光打好了基础，对我大学毕业后当老师、学术交流，后来当律师打官司法庭辩论，帮助邪气大。从初中到研究生时代，我还抓紧辰光先后学过英国闲话、俄罗斯闲话、日本闲话搭法国闲话，对我个学术研究、国际交流、出境旅游带来了交关方便。不过，勿瞒侬讲，我顶欢喜个是讲上海闲话，因为我辣辣迭个城市里头出生、长大、成才。再讲，从阿拉爷到我个孙囡一辈，阿拉四代人侪生活辣上海，上海闲话是阿拉四代人融入迭个城市、生活得有滋有味个有效工具告载体。所以，我也建议新上海人，勿妨侪学会讲上海闲话，侬会得觉着老方便、老有劲、老开心个。