我所在个工厂是从上海内迁来个，厂里个第一代侪是上海人，当年二十郎当个年轻人如今全七十多岁了。搿些老上海家乡情结极浓，50多年过去了，其中勿少人一句标准个武汉话还勿会说，厂里屋里侪坚持讲上海话，比如我个父母。

　　作为厂里第二代，阿拉当中许多人侪是由爷爷奶奶、外公外婆带大个，辣上海读完小学然后到武汉上中学，阿拉搿点小辈上海话、武汉话侪会讲个。

　　“介多年数呒没回上海了，也勿晓得阿拉个上海闲话人家听得听勿懂？”父母常有搿样个顾虑，辣伊拉看来，如果被看作“乡下人”，实在是奇耻大辱。

　　去年我去上海培训，一出火车站就熬勿牢秀了一把上海话，问一位便利店营业员：“河南北路哪能走？”

　　“什么‘乌鲁乌鲁’？我听不懂。”营业员用普通话回答了我。辣她听来，上海话个“河南北路”就是“乌鲁乌鲁”。

　　看来伊是外来务工人员。我换了个人问，人家依然听勿懂。我搿才发现今非昔比，马路浪向个外地人好像比上海人还多，尤其年轻人当中。

　　记得阿拉小辰光，外地人如果勿会说上海话，葛末就是件老严重个事体。阿拉小八腊子就常常围着外地人朗诵“儿歌”：“乡下人到上海，上海闲话讲勿来，米西米西炒咸菜……”如今，说普通话甚至纯正个“乡下话”，辣上海一点不会有心理障碍了，可见上海人排外个情况大有改善，真正海纳百川了。

　　到了培训单位，伊搭有不少上海本地人，终于找到了一个能大讲特讲上海闲话个地方。交流了几天，我发现阿拉告现在上海讲个上海闲话之间确实有差异。具体体现辣某些单词、词组上，比如我说个“矮凳”，一位年轻个上海女孩就听勿懂，伊拉只叫“凳子”，可能是现在已经呒没小矮凳搿种东西关系吧。另外跟武汉话一样，新上海话也夹杂了越来越多个普通话、外来语，一些土词渐渐消失了，所以方言特点渐渐模糊。

　　“可能个上海话更标准，因为停留在了上世纪八十年代前，呒没受到其他语言，比如网络语言之类个干扰……”一位亲戚搿样讲，我把“喜讯”告诉了父母，伊拉听仔高兴得勿得了。看来伊拉辣武汉坚守上海话，拿工厂跟家属区变成了“方言岛”，总算有所收获。只是伊拉搿代人已经过世了勿少，“方言岛”几乎已经沦陷了。

　　方言搿东西，曾经是人才流动个阻碍。然而如今面临消失，又让人若有所失。比如上海如果失去了上海话，与深圳相比，除了楼间距普遍小许多，也看勿出有多大区别了。而一座座呒没地域特色个城市，会让远方失去吸引力。