开茶馆，盼兴旺；摆茶摊，为糊口。同样是做茶水生意，相差就大了，再讲，孵茶馆个侪是呒没事体个，吃茶摊个侪是做生活个、读书个、出汗个。

　　茶水摊摆辣晒不到太阳个阴凉处，等到要晒到太阳个辰光，茶水摊就搬到了马路对面。茶水摊个老板娘——搿个称呼实在也是勉强，一个摊主罢了，绝没有像《沙家浜》中阿庆嫂一样个八面玲珑，但是小本经营又是勤快，又是卫生，也面慈目善，客客气气。小桌台浪个八杯十杯大麦茶，侪是凉透了个，适合年轻个牛饮型，小朋友来了还有冷开水，1分一杯，老少无欺。每一个茶杯侪有茶杯盖，玻璃个，有些茶水摊简陋一点，也必定要用一块块小玻璃用作茶杯盖，挡脱个不是灰，是苍蝇小虫一类；茶水摊虽小，爱国卫生很重要。喝过个茶杯，老板娘倒是一定会浸辣消毒水里个。茶水摊虽然也有两条长凳，是拨过路人歇歇脚个，要喝功夫茶是不可能个。棒冰雪糕倒是有个，光明牌个，其实也只有一只牌子个冷饮。雪柜是不可能有个，就储藏辣大口保温瓶里；有大人带小人经过，亲切个招呼一句，说不定就拿一根雪糕卖脱了；8分钱，当然比茶水好赚。剥下来个包装纸，禾聚(shou)起来还可以卖废品。

　　茶水摊个老板娘是哪能一个身份？连小业主也算不上，只是一个无证小生意，虽然搁仔脚坐辣，心里多半是辣羡慕马路旁边两扇大门紧闭个国营纱厂个挡车女工，因为小业主生老病死呒没劳保。辣解放后个很长一段时间，劳保就是生活等级，就是政治身份。从国营个纱厂到无业茶水摊，辣普通人常识看来，可以讲天差地别。

　　当然搿个茶水摊摆辣马路旁边，看中个只是搿一块地方既阴凉又人来人往，而不是纱厂个女工，纱厂女工侪是“做人家”个，下仔班，嘴再干，也不会辣茶水摊吃茶个，肯定就是回屋里去喝了，也侪是凉透了个。茶水摊老板娘有所不知个是，挡车女工虽然地位老高，但是每一次看到茶水摊女人脚翘翘个告人家搭讪，侪会辣一面孔勿屑中，暗生羡慕：伊一日坐到晚，生活也勿要做，老开心个，阿里像阿拉挡车工，还要翻三班唻？