到五台山去白相，自由行。进山个长途巴士浪向碰到一群老太，侪是阿拉上海人。伊拉是旅游加进香，一路浪向山河茄茄，玩笑开开，非常个热闹开心。刚进山就有关卡，车子浪个乘客一塌刮子被关照下车买好入山门票，再凭票重新上车。一张搿样个门票百多少元，记勿清爽了。巴士又开动之后，老太们侪有点扫了兴：“一座庙、一片瓦、一块砖还呒没看见，就要付钞票了！真正到了山上，还勿晓得哪能呢！”这班老太太，尽管侪讲上海闲话，但内中还有几位川沙阿奶、苏州好婆、宁波阿娘，多多少少还带着老家个乡音。

　　第二天一早辣山浪个汽车站又碰见迭群老太。一面孔个勿开心、勿捂心。原来搿搭里上五个台巴士车票连一张也呒没了？售票窗口里传出话来：“一个月之内上五台山个车票全被各大旅行社团体订购了。散票呒没。要上山个自己想办法。”办法倒就辣眼门前——一大群黑车司机辣起劲个拉客，上一个台最低底价四百块。可以等候侬进庙烧香、景点拍照之后返回原路。还欢迎拼车，自由组合。上海老太背着黄色香袋，分外扎眼，当然成了黑车司机个拉客重点。老太们商量来、商量去，还是肉麻铜钿。

　　“跑遍五台山光车钿就要千把块，吃勿消个！”

　　“对拜菩萨个人也要来敲竹杠，勿作兴个！”

　　见我是上海人，阿奶、好婆、阿娘们拉我一道开会讨论。我放弃了，连同辣五台山浪再上一道台阶。

　　回太原个辰光又与老太们同上一辆返城快速巴士。巧事。冤家路狭，亲家也路狭。快速巴士标明一路走高速公路，票价七十块。车子到高速公路进口处前熄火停了。巴士司机一脸笑容招呼大家：“现在油价又涨，所以请大家每位再加十元钱。如果半数以上不同意的，那么我们就从普通车道走。时间上要比走高速慢上一个钟头。请大家统一决定。给大家十分钟考虑……”伊下车吃香烟去了，笃笃定定个。其后辣吃两支香烟个辰光里，车厢里个闹猛就不细表了。反正最后是全体投降，大家侪乖乖叫缴了十块钱。上海老太们侪叹气：“又拨人家敲了一记竹杠。作孽作孽！”

　　敲竹杠是上海闲话。意思明了：用不正当个手段来敲诈钱财。敲竹杠个由来已经算老里八早个故事了。还是旧时流通铜钱个时代，店铺里侪设有一个粗毛竹制成的钱筒，每日收进个铜板都投入竹筒里。店老板见有洋盘个顾客上门买东西，便轻敲钱筒给伙计暗示加价。敲竹杠就是欺侮生客个手段。敲竹杠后来个意义被引申开了，不单单只是商家店堂里个专利了。

　　与上海老太们道别时，我对伊拉笑道：“阿拉个交情，就是被敲了一路个竹杠……”哈哈。