偷听别人家讲闲话，成语有一句生动个比喻：“隔墙有耳”。辣上海闲话里，搿样个举动叫做“听壁脚”，同样刻画得入木三分。试看，要偷听到别人个言语，贴辣墙壁跟前，或者躲辣壁角落里，竖起了耳朵用心捕捉隐隐约约个声音。假使来画一张漫画，可以勾勒一道身影，辣板壁之后只露出一只耳朵，辣板壁之下只露出一双鞋子。听壁脚者，当心而又紧张就搿样显现出来了。辣热播一时个电视剧《潜伏》中就有一个听壁脚个特务角色辣时时刻刻偷听余则成个一举一动、一言一行。小特务把耳朵贴辣余家个门板浪，丑态毕露。

　　生活里总有一些存心存意、一门心思去听别人壁脚个人物，鬼鬼促促，心术不正。老早上海人住得局促拥挤。一幢石库门里，七十二家房客。厢房一拦（lak)二，变前后两家人家。客堂隔成左右各半，又是两家人家。都是板壁，隔音就成了问题。张家屋里向吵相骂，李家被旁听。楼浪王家掼家生，楼下刘家吓一跳。交关声音、闲话传过来传过去，邻居隔壁是被听了壁脚，勿得勿听了进去。

　　有了听壁脚，就跟出戳壁脚个故事。好事勿出门，坏事走千里。上海滩个旧式里弄里，前弄堂里1号搭2号争争吵吵个事体就传到了后弄堂。后弄堂里天井里灶披间里常常少脱煤饼个事体也就传到了前弄堂。人各有亲疏，人各有主见，戳壁脚个故事也就由此而生。戳壁脚，上海闲话。要翻译成普通话，即辣人背后讲人坏话，挑拨离间是也。辣工厂个车间里，辣办公个写字间里，也会有人前人后戳戳壁脚个事体。“有啥个勿适意侬当面来开销。勿要鬼促促跑到领导伊面去戳我个壁脚！”听壁脚、戳壁脚个人是怕拨人家拉出来晒太阳个。

　　现在个各地电视台都有调解生活矛盾个谈话节目。不外乎是阿婆告媳妇、丈夫告老婆、兄弟告姐妹或为感情或为财产辣电视里大倒苦水。有辰光做节目甲方、乙方缺了一方，到场个一方，对大众个告白往往就滑到了戳壁脚个地步。观察员或调解员听了一面之词个壁脚，也会一本正经个戳一记缺席者个壁脚。据讲搿样子个节目收视瞎高。看来孵辣屋里看电视里人家个听壁脚、戳壁脚相骂既有趣又安全，一点风险也呒没。我只是弄勿懂：晒屋里个矛盾、晒个人隐私会成为一种时尚。搿样子个节目还走红了一批主持人，像老娘舅、老阿姨、骂山门先生等等。骂山门也是上海闲话，用普通话来讲，“咆哮”是也。呵呵。千万勿要咆哮到我头浪来。