上世纪五六十年代，一到天热，弄堂里就会响起噼里啪啦个木拖板鞋声音。如果木拖板鞋声突然集中响起来，葛末大半是啥地方出了啥事体，看热闹个人聚辣一道了。迭个木拖板鞋其实也交关简单，用厚木板做成鞋形，在鞋头前钉上橡皮或帆布条就成了。水陆两栖，交关实用。就是辣拉办公室做个职员，一回到屋里，也马上脱下皮鞋，穿上木拖板鞋，乘风凉、荡马路，到处好走，交关爽气。脚龌龊了，就随时可以用水冲冲，邪气方便。后来看到有个人家大概是华侨吧，穿了用脚趾夹住个人字形海绵拖鞋，大家眼热得勿得了，就像现在看到进口“耐克”一样。再后来，弄堂里个木拖板鞋噼里啪啦声慢慢少了，直到呒没了，原来大家侪有海绵拖鞋告塑料拖鞋了。