有人讲，上海话是上海开埠（1843年）以后开始形成个；有个人讲，上海辣辣开埠前还是一个渔村。 

　　搿两个讲法侪是缺乏根据勿着实个。葛末上海话是哪能产生个呢？ 

　　古代辣长江出海个三角洲浪向，有一条从西到东、水势浩大个松江，后来叫伊吴淞江，本来辣现在个吴淞江又叫苏州河个北面。辣辣伊下游要进海快个地方，有两条支流，一条叫上海浦，还有一条叫下海浦，上海浦后来就变成了从龙华到外白渡桥个一段黄浦江，搿个辰光上海浦狭吴淞江阔。吴淞江伊拿搿个三角洲分成淞北搭仔淞南两大块。古代个上海方言就是自从有了上海浦、有了上海人个聚居以后开始形成个。用“上海”称呼个聚落，有得可靠证据可以查着个，最早的记录是辣北宋熙宁十年（1077）《宋会要辑稿》浪，搿本书浪写辣海：辣华亭县（后来叫松江县）个东北方，有一个管理酒类买卖搭仔征酒税个集市，名头叫“上海务”。搿个地方大约辣现在个黄浦区人民路告中华路环线里向个东北一侧，东面就是上海浦。搿本书个记载离开现在已经有936年历史了。 

　　后来到了南宋，吴淞江开始淤塞，原来辣吴淞江浪向华亭县个大港口青龙镇勿能够停船了，乃末就拨拉上海务替代，政府辣辣上海设立了主管商船税收个市舶务。又到了宋元之交，上海已经发展成为华亭县东北个一个大镇。到仔元朝至元廿八年（1291），就拿华亭东北个五个乡划出来成立仔上海县。搿个辰光，上海已成为滨海大港了，蕃商云集，县治原旧辣辣北宋个上海务地方，上海浦东西两岸已经形成了一个巷陌纵横个人口聚居中心。 

　　语言分化搭趋同，告社会搭仔生活范围个分合是密切相关个，主要是因为某个地方有了一定程度个经济活动，就会形成人口个迁徙搭聚居。大家长期聚集辣一个比较自足个生活区域里，搿个地方个语言就可能会得有别于附近个语言形成另外一个语言中心。搿个辰光，上海县个户数多到6.4万户，人口有数十万，乃末一种有别于松江方言个上海方言就搿能介生成了。所以上海话至少也有720多年个历史了。辣辣淞南长期稳定个松江府地域里向，松江搭仔上海后来一直是松江府个两大重镇，上海搿块地方就讲上海话，上海闲话是松江闲话辣辣黄浦江（原上海浦）两岸个一个分支。