菊黄蟹肥。秋风一起，又到了吃蟹个辰光。上海人欢喜吃蟹。上海人最最欢喜个是河蟹，大家叫伊为大闸蟹。最好个大闸蟹出自江苏阳澄湖。上海郊区也出蟹，个头要比大闸蟹小脱一圈。崇明岛辣上个世纪六十年代围垦之前，可谓遍地是蟹，崇明蟹。我到崇明农场去种田个几年里，当地个老农民就教阿拉知青去捉蟹。捉蟹，拦、钩、钓。拦，辣水闸前张开一张渔网，网个一半入水沉进河底，一半露出水面棚紧。夜半时分，水闸放水，河里个大蟹、小蟹迎水流而上，纷纷爬上渔网。大家就见一只、捉一只，可谓愿者上钩。辣渔网上点起汽油灯照明，效果更好。一夜下来，捉个几铅桶崇明蟹，一点勿吃力。钩，是用竹棍、芦秆甚至脚踏车轮盘上个钢丝伸到蟹洞里去钩出蟹来。成功个要点是侬必须寻得到、辨得清河浜边上个蟹洞。蟹洞圆而扁，河泥上还可以依稀看出蟹脚爬过个痕迹。勿然，从泥洞里钩出一条水蛇来，要吓得侬半死。钓。以蔑竹编个小篮，浅浅个，当中固定是一块蛙肉、半根蛙腿，用钓杆垂进河底。钓绳一动，就可以从水里拉出竹篮。河蟹老笨老笨个，伊一水就死死咬牢蛙肉，打煞伊也勿会松口。钓蟹就如同钓鱼，比个是耐性。一个下半天也可以钓上来一锅子蟹来。伊个辰光每当深秋，崇明岛小蟹吃撑吃撑。 

　　买蟹是考验侬拣蟹个本事。尽管上海大小马路上开了交交关关个阳澄湖大闸蟹个店面，但正宗个却数勿出有几爿。阳澄湖个蟹，青背、白肚、金毛。雌蟹三四两一只，雄蟹半斤左右一只。千万勿要以为套上了阳澄湖大闸蟹防伪标识个牌子就是真品了。“伪军”多得勿得了。就是侬奔到巴城去吃蟹，辣蟹舫里端上来个阳澄湖大闸蟹也难保勿是“汏浴蟹”。其实现在上市个太湖蟹味道也勿错。将就一点，苏北蟹也可以尝尝。价钿毕竟要低得多了。挑蟹要拣“蟹门”开了个蟹。“蟹门”位于河蟹搿蟹背与蟹肚之间。此地撑开了，搿只蟹一定壮，蟹黄蟹膏一定暴出来。馋煞侬。 

　　老早吃蟹，上海人推崇蒸蟹。蒸蟹个缺点是火候难以掌握，生熟难保。现在流行煮蟹。把蟹放入锅里，生水浸没。大火烧。随后依据蟹个大小，或滚四五分钟，或滚六七分钟。之后撇去大半锅子个开水，只辣锅底留下半寸个热水。再盖上锅盖，蒸伊个一两分钟收收水。可也。当然，煮蟹之初还可以放点姜片、浇点老酒。上海大饭店里烧蟹已经都用搿个办法了。保熟、保鲜，蟹肉不至于被蒸得太干、太烂。吃蟹程序就是每人爱好了。从蟹脚吃起还是从蟹兜吃起，就随侬高兴哉。