碰着“上海”打头个地名，上海人是勿讲“上海”个。

　　外地回转，火车进入上海地界，上海人会得垃其他乘客面前讲：“到了”，勿会得讲“上海到了”。葛前头省脱个两个字，显示了讲闲话个人个当家作主个气派。同样，尽管老早仔虹桥机场“上海”两个字红光锃亮，上海人也勿会讲“上海到了”，顶多讲“好，虹桥到了”（现在新个航站楼标个是虹桥机场）。还有十六铺、吴淞口、上海港客运中心，乘船回来个上海人也一样仔讲法。上海就垃眼门前，就垃船下头，就垃岸浪向，告咾【所以】用勿着讲个。“到了”，就包括了上海，勿讲出来，心里焐满了尊敬，讲出来，反而陌生了。

　　对市级个文化体育设施，上海人也省略脱“上海”，只讲简称。因为市级设施本身就是名冠上海、名扬上海个。搿眼地方垃上海人心目当中侪是大名鼎鼎、独一无二、勿可取代个。讲个人听个人侪煞辣势清，用勿着加“浇头”个。还有大剧院咾啥是世界顶级个，讲“上海”，好像拿伊拉降级了，告咾勿讲。上海体育馆叫“万体馆”，上海体育场叫“八万人体育场”，上海游泳馆叫“游泳馆”，上海图书馆叫“上图”，上海博物馆叫“上博”，上海音乐厅叫“音乐厅”，老早仔个上海美术馆叫“美术馆”，一律去脱帽子直呼其名。

　　上海人勿讲上海，主要还是心里向有自豪感、自信心——因为讲个人听个人侪老早就拿自己包括到上海当中去了，大家侪是上海，阿拉侪是上海，葛末就用勿着再讲上海了；上海人勿讲上海，是交流双方个高度默契——垃长期个城市生活当中，对知名度高个带“上海”个地名，已经约定俗成，有得共识，共用一种特指个讲法，讲个人清爽，听个人明白；上海人勿讲上海，是精明、爽快——上海人节奏快、讲闲话勿噜苏，口语比书面语简约、明快，可以用最简单个约定俗成个讲法来达到准确、传神个效果；上海人勿讲上海，其实时时刻刻拿上海摆垃心浪向——上海人心里囥牢了一种老深个感情，迭种感情就叫热爱上海，就叫欢喜上海，老欢喜老欢喜，欢喜得来呒没闲话好讲。

　　搿能介看来，上海闲话勿仅仅是一种地方语言，伊个实质是上海市民对上海迭座城市个高度认同，是生活经历告【和】文化理念个浓缩，是上海城市精神个特种媒介。