所谓白戏就是指覅钞票个路边街头表演，阿拉小辰光顶顶欢喜看了。

　　上海刚刚解放个辰光，马路浪覅讲汽车，连脚踏车也呒没几部。倒是小马路浪邪气闹猛，人来人往，各种小贩哇啦哇啦喊得一天世界，迭种地方白戏也多。当时阿拉刚刚读书，学堂里布置个回家作业勿多，每天放仔夜学，就趴垃拉商店门口个台阶浪，急吼吼做好功课，快点钻进人多个地方寻白戏看。特别是夏天黄昏个辰光，马路边头个白戏多得来勿及看。

　　我最欢喜看个白戏是狲出把戏，狲随着主人个口令或者敲铜锣个节点，翻跟头，竖蜻蜓，还会自家从箱子里拿出面具戴好做怪腔，甚至会像模像样舞棒弄刀，常常引得大家捧腹大笑。表演结束，狲会按照主人个吩咐朝大家打躬作揖讨钞票，好看得勿得了。狲出把戏虽然每趟侪是老花头，但百看勿厌。再有个白戏是气功或武术表演，表演之前，伊拉先垃拉靠人行道浪用粉笔或石粉划一道直径大约莫四五米个圆弧作为警戒线，以防勿当心伤人。表演当中，有拳操对打，也有刀光剑影；有掌劈青砖，也有腹顶长矛等，看得大家心惊肉跳，连声喝彩。不过，搿一类表演，到最后大多是卖治疗跌打损伤个膏药或伤药。由于看表演个大多是踏三轮车，拉塌车，推桥头，扛大包等卖苦力个人，多多少少侪有点腰酸背痛，所以蛮受欢迎，买药个人也交关。还有个白戏阿拉就有点茄门，实在呒没更加好看个白戏，也会去轧轧闹猛，搿个就是卖可以汏各种油迹个肥皂。卖个人先垃拉地浪摆一盆清水，盆子边浪有几只分别装仔酱油，菜、豆油，机油个小玻璃瓶，介绍结束后，就拿出一块白布，各种油侪倒一眼垃拉布浪向，白布马上变得污迹斑斑，再用伊拉介绍个肥皂对牢污迹来回搨，用力搓，然后放到清水里漂洗，原来个污迹就侪呒没了。整个演示过程看上去好像呒没一眼瑕疵，买个人也勿少。不过，伊拉个肥皂侪是自家做个，是用花花绿绿个糊墙纸头包装个，是的的呱呱个“三无”产品。我听人家讲，伊拉演示个肥皂同卖拨人家个肥皂并勿一样，真个假个只有天晓得。

　　我小辰光看过个白戏，印象最深个是有一天放夜学，看见人行道浪有个人拿仔根又细又长个棒头，对牢墙浪一块写有各种小毛小病以及日常生活当中碰着个各种问题个布头一边讲，一边指指点点。原来伊是要推销一本介绍治疗迭些毛病个民间偏方以及生活小窍门个油印小册子。伊也摊开来对大家讲，搿本小册子，是伊从当时报纸杂志浪摘录下来，汇编后自家刻印个，勿是瞎三话四来骗钞票。为了证明搿本小册子个实用性，伊告诉大家一道哪能根据月份与日脚算出是礼拜几个公式，并当场叫人出题演算，百算百准。虽然我当时呒没钞票买，但伊搿道公式我记得邪气牢。如今我年逾古稀，仍旧用搿道公式来算日脚，根本就用勿着看日历，交关灵光。

　　随着国家经济个发展及城市管理个完善，路边街头个白戏也逐渐销声匿迹，以致现在有人拿人家寻相骂，打相打等纠纷也当白戏来看，搿同阿拉看过个白戏完全是两码事。