上世纪五六十年代出生个人，小辰光侪蛮艰苦个，吃个物事是计划供应，住个房屋侪勿宽敞。伊个时代屋里小人侪蛮多，到了七八十年代个辰光小人侪长大了，一成勿变个居住空间就显得越住越轧。哪能办？要么爷娘单位条件比较好，可以福利分房，解决实际困难。挨个辰光呒没“买房子”搿种讲法，讲出来要吓坏个——钞票啥地方来介许多？有一眼大人动足脑筋，还是走投无路，只好因地制宜，去买木材叫人来屋里搭阁楼。

　　上海人住个老房子一般层高侪蛮高，搭好阁楼就能改善住房困难了。大人经过一番辛苦，搭好阁楼，尽管阁楼浪人弯腰立勿直，小人侪老开心个。小人就好睏到阁楼浪去了。一部简易活动扶梯，小人爬上爬下侪蛮好奇个，有辰光小人勿当心掼下来，血也掼出来了，小人还是喜欢上阁楼，总归屋里变大了，同爷娘分开来住自由呀，阁楼是一个小世界。

　　八十年代初阿拉刚从学堂毕业进单位，有个师傅伊蛮讲究品味个，屋里是方方正正一间房间，摆式洋气、考究。伊有一个独养儿子，儿子到了结婚年龄，屋里只有一间房间，师傅烦煞了，本来一直勿愿意搭阁楼，因为勿想破坏空间结构。后来想来想去只好搭阁楼了，搭好阁楼，师傅和师娘就只好住勒阁楼浪向，房间就拨儿子做了新房。

　　儿子结婚后二三年伊拉有小人了，一家三代同堂。后来小人也一眼眼长大，师傅退休了，但居住还是呒没改善，生活质量可想而知。师傅儿子下决心辞掉原来个公家工作，去了外地做生意。九十年代末师傅儿子赚了点钞票回上海，看到许多新房子平地而起，就决定也要买房子。伊拉一家门去看了交交关房子，最后看中了一套复式房子，因为有个地方抬勿起头，交关面积是勿算钞票送个，比较合算。伊拉讲搿是阁楼翻版，师傅讲还有老房子搿味道。一家三代人又好住了一道了。第三代小人读书也有单独一间房间，一家人生活过了邪气适意。屋里常常还会有交关亲眷朋友来白相，笑声勿断。伊拉讲新个三代同堂是有质量个三代同堂。真是赶上好时代了，日脚越过越开心。