雁荡路是勿是上海滩市中心最短个马路？我看，勿是最短，伊至少也算最短最小个马路之一了。雁荡路北面顶牢了淮海中路，东侧是大名鼎鼎个妇女商店。雁荡路南面连通到复兴公园，西侧是历史长久个科学会堂。与东西向个思南路相交个路口是老饭店洁而精。洁而精本来是坐落勒兴安路上个一爿私人小饭店，后来姓“公”了，登堂入室搬到了现在个铺面，成为上海人叫得响个川扬菜馆了。洁而精斜对面是雁荡大厦，伊可以称为上海最早对外国人开放个楼盘，当时要以外汇来售楼个。进进出出，以金发碧眼个新上海人为多。一条小小个雁荡路，花头勿勿少。不过对普普通通个上海人来讲，雁荡路上名气最响个却只是一爿小面馆，称为味香齐。搿爿面店只有一开间门面，前店后厨。店堂面积最多三四十个平方，螺蛳壳里做道场，只可以坐下四十几个客人。后到个吃客是人盯人，立勒小方桌旁边等空出位子来。买筹码个排队要排到店门外。店堂内外好像轧电车，大家都要侧身进出。味香齐个招牌面点是麻酱面、辣酱面加小碗牛肉汤。老吃客们要个几乎一式一样：麻酱拌面加辣酱浇头，再来一碗牛肉汤。吃搿点点心，当下个价钿是共计三十块。

　　我个外婆家是太仓坊。从小弄堂里穿出来就是味香齐。因此我从戴红领巾吃搿碗面吃到了领敬老卡。从辣酱面一角五分一碗吃到了十块一碗。从当学徒工到光荣退休个下面师傅，被我吃走好几拨。我完全可以评上味香齐个资深顾客。现是新个下面师傅又上灶了，我要争取吃面吃到伊也下课退役。大家要问：介好吃？介有味道？百吃勿厌？留只关子，侬自家去尝尝滋味吧。老上海个味道吃得出、讲勿出个。

　　近来雁荡路上南端新开出一家黄鱼面馆。店招大书一行字：“到撒地方气缺伽好缺额黄鱼面。”搿句上海闲话不以大家通用个文字来书写。我看是店家故意而为，考试新老上海人个上海闲话水平。我还猜测搿爿面店个老板大约是宁波上海人，伊不讲吃，而讲缺，“缺哪缺哪自瓜人。”老宁波个口音是也。黄鱼面馆里最便宜个一碗小黄鱼面是三十八块，面向个是白领阶层。麻酱面是团结老上海。黄鱼面是招徕新上海。雁荡路浪打出了吃面对台戏。好戏勒后头。讲句吉利闲话吧，吃来吃去，大家都是赢家。哈哈。