世界杯好白相个事件常常发生辣球场外。因为要辣好几个主办城市间赶来赶去，迷路个故事就勿勿少。一个经典个段子是“半夜鸡叫”。几个结伴而行个国内老记留宿辣半途，是德国个一个小城市。旅店就辣火车站边上个一个小宾馆。大家去游览市容，东走西钻，左拐右转，迷失方向。打的，讲勿来德语，司机又听勿懂阿拉个中式英文，更何况大家一点都讲勿清爽住宿个宾馆叫啥、辣啥个方位。灵机一动，让司机拉到火车站就可以了。为表示出火车站，大家来表演口技：“喔——”搿是火车拉响了汽笛。“咯——咯——咯咯咯、咯咯咯、咯咯咯！”搿是火车由慢到快提速开了。德国人聪明，伊打了手势表示“OK”。大家上车，一路狂奔。不过苗头勿对，车子开上了乡间小路。大概是抄近路了，大家相互安慰。天擦黑了，到了。到了一个养鸡场，大家昏脱。现在由司机来表演了：“喔——咯咯咯！”他学个鸡鸣鸡啼比阿拉更出色。有啥个办法呢？重新交流，终于使伊明白目的地是火车站。后来大家才琢磨出欧洲早就呒没蒸汽火车了。伊拉是开挂辫子个电动火车了。一场热昏个误会。

　　我和晚报个几个老记去租了辆大众，自驾。伊个辰光还呒没导航仪，电脑、手机都派勿上用场，自家寻路。我做向导。我做事前个功课，就是弄清爽要去个伊个城市是辣啥个方向。南北便当。欧洲个农庄也多半是坐南背北。东西就靠太阳来辨别了。早上迎头朝太阳开，搿是向东。下半天去追夕阳落日，那是朝西。方向认准了。上了高速道路就寻城市个名称。搿点外文再弄勿明白，真是文盲干部了。跑了好几个国家、十几个城市，呒没走过冤枉路。大家开心，尊称我为太阳导航仪，顶礼膜拜。

　　只出过一趟洋相。搿一天是阴天，太阳导航仪因此失灵。车子开进了一条大路。呒没叉道，光起了火就一直朝前奔。忽然一片开阔地。有一队士兵辣认真操练方阵。我发现了伊拉军服上佩有星条旗，是美国兵。原来阿拉几乎就闯进了美军基地。趁美国大兵还呒没反应，马上调头，撤退。走勿多远，空中响起了轰鸣声，一架军机悬辣阿拉车头上空。伊可以挂辣空中勿前勿后、勿上勿下，好飞机！顾勿上了，车子加足油门，开溜。白相了一通“老子一溜烟，小子干瞪眼。”虚惊一场之后，我个太阳导航仪就砸脱牌子了。不过，日后每每讲起搿场空中地上对峙，大家还是相当快活。如此遭遇，人生难得啊。