我跟阿拉老婆是垃拉上个世纪七十年代初认得个，迭个是连草纸自来火也要计划供应个年代。结婚个辰光，布票东拼西凑，好勿容易才添置几件新衣裳搭仔床浪用品，后来我屋里向个布票就年年用来还“债”，或者支援亲戚朋友。有了儿子以后，小家伙个衣裳年年要添，布票就更加紧张。大人还好讲，厂里发个工作服一年穿到头，但小人勿好太推扳，哪能办？

　　迭个辰光，垃拉金陵西路靠近龙门路，也就是“八仙桥”个地方，有爿服装厂个门店，迭个店从来勿卖衣裳，只卖厂里向做衣裳裁剪下来个边角料，或者裁坏脱个各种衣片等零头布。因为覅布票，又是称份量卖，价钿也便宜，告咾门面勿大，但邪气闹猛，特别是礼拜天，店门口侪是人。迭个辰光，我一有空就去淘零头布，为儿子做内衣，做外套。啥人晓得做衣裳及勿上儿子长得快，我成了迭爿店个常客。

　　迭爿店垃拉开门前头，营业员就按零头布个花色品种，原料质地，分门别类捆扎成小包，按照勿同个价钿，分别堆放垃拉店堂里个台子浪，让店外个顾客指认挑选。卖个辰光，顾客勿好拆包，看中以后，营业员就放到磅秤浪称份量报价，一手交钞票一手交货。来买零头布个人，事先侪有自家个要求，面对一包包花花绿绿、又勿能拆包挑选个零头布，有点人就会犹豫再三，拿勿定主意，垃海后头个人就要催促，埋怨；有点人看豁边买到勿是自家想要个，但零头布买卖勿退勿换，迭能一来，就会懊恼后悔；也有人“额骨头”高，齐巧买到想要个，就笑得嘴巴也合勿拢。

　　有年儿童节前头，我准备为上幼儿园个儿子做套新衣裳，老里八早就赶过去，啥人晓得店门口已经侪是个人，我只好立垃拉外围等候观望。迭个辰光，有一位头发雪雪白个老阿婆，两只手举过头，捧仔一包灰色个零头布，好勿容易轧出人堆后，就来煞勿及拆包看，看仔一歇，伊眉头皱起自言自语：“介小个料作哪能办啦？做出来个衣裳侪是接缝，难看煞唻。”原来，伊想为小学毕业个孙子做身套装，呒没想到料作颜色蛮好，包垃外头个一块看看蛮大，里向侪是整整齐齐一叠巴掌宽，两尺来长个小料。伊抬头看见我，就问我想做点啥，我讲想为上幼儿园个儿子做身外套。伊一听，连忙讲要让拨我，怕我勿要，伊又讲：“迭种料作、颜色，男小囡做外套顶脱唻，我是好勿容易才抢到手个。”听伊迭能一讲，我也心动了，也省得我轧进轧出，随即就接过来稍许看看，估计为儿子做身外套，还有点多余，就摸出钞票买仔下来。伊接过钞票，一转身又拼命朝人堆里钻。

　　回到屋里，我拿小块拼成功大块，再按照买得来个服装纸样裁剪缝纫，呒没多少辰光，新衣就做好哉。虽然接缝勿少，但因为是色布，远看一点也看勿出。再讲儿子小，也勿管好看难看，只要是新衣裳就邪气满足。迭天让伊试穿个辰光，小家伙竟然勿肯脱下来，还缠牢我要到公园里向拍照。多下来个布料，我就拼拼凑凑，为自家跟阿拉老婆分别做两只假领头，也算是慰劳。 

　　一眨眼快四十年了，儿子早已成家立业，因为工作关系，伊个西装现在就有十多套，但伊每次到我屋里来，总要对相框里一张伊小辰光穿仔我用零头布缝制个新衣，坐垃拉我与妻子中间个照片看交关辰光……