辣上海生活了七十多年，一开始中学有些同学是浦东人，还听到勿少上海闲话。后来孤岛时期，江浙一带较富裕个人都涌进租界，辣大学里听到个是南腔北调，十分复杂。全国解放后，普通话广泛流行，十分难得听到比较地道个上海闲话。

　　最近两年来，各地重视方言，《新民晚报》创办了《上海闲话》专版，我认为是十分及时个英明决策。读了许多文章，获得了勿少过去勿知道个常识和事物。

　　但是，随着问题个逐渐深入，困惑也随之增多。例如一个“大”字，根据用法或习惯个勿同，居然读法就勿一样，尤其像上世纪二三十年代个“大英大马路”，两个“大”字前后读音勿同，搿个是很值得研究个。

　　我发现凡是属于专门名词，读法基本上是普通话个同音，读dha。例如大连市、山西大同、大渡河等；还有商店个名称，如协大祥、宝大祥、大世界、大光明、老大房等；有个名字，如张大千、陈大悲、钱大钧等；商品（包括报纸）名称，如大麦茶、大饼，如《大公报》、解放前个《大美报》《大英夜报》等。

　　还有个辣两可之间，如大小老婆、大伏天、大米、大年三十、大年初一等，谚语“若要好，大做小”，诸如此类，普通话读音或上海闲话读音都有。

　　对于高官、名人，有两种讲法，称大人物，基本上是普通话读音，称“大好佬”，语词、读音全是上海闲话了。

　　褚半农著《莘庄方言》，对上海闲话作出了重大贡献。但是，还有些问题可以商榷，难作定论。

　　伊对“大马路”个解释认为“指路宽行人多”。又说：“从大马路向南排列，比二马路、三马路显大，故称之。”究竟以何者为主呢？辣老上海人印象中，南京路确是上海最早个上规格个相当标准个“马路”，当时还通行马车、又造了跑马厅，因此被称为“大英大马路”。上海人当时称英国为大英帝国，是被迫而尊称，用了普通话。而“大马路”就用上海闲话个“大”字读音了。

　　还有“大菜”，《莘庄方言》有所遗漏，大菜固然与小菜有别，勿是小碟，勿是冷盆，而是红烧清炖个鸡鸭鱼肉。但是搿仅是一解。上海闲语个“大菜”，主要是西菜，当初闭关自守，轻视西方人，称西菜为番菜，后来一百八十度大转弯，尊称为大菜，主要指英、法式个。俄国（包括苏联时代）式个则称“罗宋大菜”了。