程乃珊写个书，出一本我买一本，伊辣《新民晚报》《青年报》浪向刊登个文章，我太太每一篇侪剪下来收集得煞煞齐。伊个文章阿拉特别欢喜读，程乃珊女士大气、雅致、执着、勤奋，伊是倾其生命来细致描绘真实个大上海个最优秀作家，诚如搿日追悼会厅堂浪个一副挽联头浪向四个字所写：“情深意重，字切文真”。

　　伊处处弘扬海纳百川、中西融合个海派文化。伊写个上海lady，有“出得厅堂、下得厨房”个“大家闺秀”，有“上海男人最理想的太太”“小家碧玉”，也有“被西风吹醒”“追求自由爱情”个“摩登小姐”，还写现今拨老公尊为“玉皇大帝”个“全职太太”。伊写《金融家》，写《上海先生》，从写一个个大上海个创业家、开拓者个事业当中，展现老上海个辉煌历史搭创业风貌；她写“上海先生中最富海派个性的一脉”个“老克拉”，写子承父业、拓展家业个“小开”，也写弄堂门口个“老皮匠”，当“红卫兵”洗劫一空，用大卡车装满一车“战利品”开到弄堂口，“老皮匠”跳出身来张开两手拦牢车子：“你们不作兴的！天气冷了两个老人总要留件衣裳给他们！”“革命小将”拨伊个行为感动，从车浪掼下一只箱子，“老皮匠”叫出儿子相帮拿箱子拎到抄家人家个门口。

　　从2002年开始，程乃珊应邀参加了李伦新主持个“上海大学海派文化研究中心”一年一度个学术研讨会，还担任了研究中心特约研究员。从此我搭伊有了较多个交往。我搭我太太参加了以伊为中心个老上海海派文化沙龙活动好几次。记得辣七宝老镇旅游刚刚热起来辰光，伊带阿拉搭镇有关领导一道探讨哪能弘扬海派文化。辣辣各种沙龙活动里，伊个热情、开朗、坦诚、睿智，伊对上海精致文化搭传统民俗孜孜勿倦个追求使我感动，伊经常深入生活开拓题材，葛咾伊个文章总归介贴肉个。伊还写过一篇《精致文化更需要走近大众》个文章，倡导传播上海个文明。

　　2004年读了伊《上海之音》短文，深受感动，乃末我写了一篇《上海流行歌曲的春秋》长文；我又看了伊《甜蜜的回忆》一文，下决心出版我辣上世纪50年代收藏个“糖纸头”。当我搭我太太、囡儿捧了几大本夹糖纸头个书到伊愚园路屋里“献宝”个辰光，搿日天伊邪气激动，当场答应为我《糖纸头——海派文化的童年情结》一书写序。她辣辣题为《方寸之间读海派》个序里向讲：“都说百年中国看上海。然百年上海却是一部太沉重太深奥的历史，要真正读懂，谈何容易！‘上海热’热了有好一阵，然大多数一提起上海史，似就是不离‘百乐门’、杜月笙、黄包车和旗袍……但是，如若你能读懂和解码方寸之间那张糖纸头的内涵，你会从中发掘出一个研究上海史的新切入点。”

　　对啊！上海个辉煌历史是上海个实业家、金融家、出版家、文化家咾啥搭平民百姓创造个，上海人惯于恪守规矩、安富尊荣，乐惠和谐，勿是像有个电视剧所描写个搿种流氓打斗、群丑舞爪。“上海”，几化迷人个两个字啊，程乃珊忠实个写出了上海个种种迷人，活龙活现个市民精神，搿个城市个味道。

　　程乃珊写作到生命个最后一刻，辣末三篇写上海人吃咖啡个文章，就是投到“上海闲话”版面浪来用上海话写个，她还要阿拉帮伊拿文中有个上海话用字改改对，伊就是搿能个谦逊，搿能个认真！