翻翻“夜报”，我常常会想起交关小辰光个有关“夜报”个好白相事体，像煞又听到了搿个辰光卖报人叫个声音：“夜报要 ，夜报……” 

　　还是辣辣上世纪五六十年代，“夜报”是特别受老上海欢喜个一张报纸，呒没“夜报”就少脱交关饭后茶余个话题，辣辣老上海个眼睛里，“夜报”消息最可靠、最权威，勿看“夜报”啥个事体侪勿晓得，连“牛逼”也吹勿出。 

　　搿个辰光买“夜报”还老紧张个，经常会买勿到。再讲当年老百姓个收入也勿高，订“夜报”也是桩事体。阿拉一家门侪欢喜看夜报。所以每个礼拜天下半日两点一过，阿拉爷就叫我去买“夜报”，搿个辰光我住辣虹口四川北路个一条老式石库门弄堂里，每趟我侪是到附近群众剧场对面，虬江路1路有轨电车车站排队，卖报人是一对老夫妻。来买“夜报”个人邪气多，大家侪自觉个一字排开。卖报老人每天预定数量，要买“夜报”就要早点去，卖光为止。有辰光我一路白相过去，到埃搭晏了，排队个人已经交关了，排辣队伍最后头个人就讲啦：“小朋友勿要排了，我是最后一个了！”我想搿记苦了，回去要拨阿拉爷骂煞了！ 

　　侬可能只听见过影迷、球迷等退票，呒没听见过“报迷”等“退报” ？搿个辰光，假使侬呒没买着“夜报”，又老想看着当日个，哪能办？侬夜饭吃好，大概六七点钟把，可以再去报摊看看，可能搿个辰光卖报老人还辣辣，侬问声伊“夜报”还有 ？ 

　　或许伊会讲“还有一份”，但是伊拿出来个搿份报纸有点皱，或者有点龌龊，说明搿份“夜报”是伊自家已经看过，或者有种介老顾客看过以后退拨伊个，是今朝个“二手报”或“三手报”了。卖拨侬个价钿勿变。阿拉爷经常叫我去等“退报”个。 

　　如果等勿到“退报”哪能办？还有两个办法：一是去弄堂口个“夜报”张贴栏看，不过蛮吃力个。侬想想看，一张四版个“夜报”，夹辣铁丝网眼笼当中，看报个人正反两面翻了看，啥人立辣前面就有权利选择翻版面，如果侬是个矮子，视力又推扳，想看报就更加吃力了；如果齐巧碰着一个高度近视眼朋友，贴辣报纸高头，葛末其他人就只好让位了。二是有邻居订“夜报”个，伊正好带到弄堂里边乘风凉边看个，侬就等伊看好了，问伊借来看看。面皮薄个人也只能是难得一趟，天天搿能就成了“白看报纸了”，如果碰着个蛮计较个小气个，明朝伊就勿拿出来看了，要末就送侬看“白眼”了。