有一腔上海马路浪宣传卫生个标语勿勿少少：“不要乱扔垃圾！”“不要乱扔果皮烟蒂！”现在搿样子个口号少见了。爱卫生爱清洁已经变成了大家个行动了，用勿着到东到西来提醒大家了。上海人从来就讲勿来“扔”字。上海人讲起来“扔”，是厾，是掼。厾，读起来相近于笃。要能够拿“厾”写出来，我估计甚为勿会超过有小半个上海人。上海闲话是讲讲便当，要写出来难煞老上海。厾就是丢、就是投、就是掷。丢掉东西，上海人讲是厾物事。投篮球，是厾篮球。掷标枪，也用厾：“搿个外国人拿标枪厾得瞎远，看样子是会破脱奥运会记录了！”上海人平常讲得最多个是厾脱垃圾。厾脱物事、厾脱铜钿。“唉！侬搿个老头子厾脱介许多钞票就弄进来一只处理品，作孽作孽！”上海闲话里还有一句叫“厾厾弄弄”，是形容拿起来又放下来，反复勿止。“搿部脚踏车拨我厾厾弄弄，一直呒没装好。烦煞了！”呒没用处个，可以扔掉个人或者物，称为厾脱货。“小鬼头一点勿争气，真是厾脱货，白养伊介长介大了！”厾脱货只有老个上海人才会脱口而出个。

　　掼，也是扔个意思。“几只旧个纸板箱老早就可以掼脱了！”“搬进新房子，旧家生搭我通通掼脱，去买新个！”厾是心平气和个，掼是有点动肝火个。上海人屋里向吵相骂，一方发了脾气扔这丢那，另一方就会骂一记山门：“好，侬敢掼家生，侬当我勿敢？”掼家生是老上海弄堂里个通常节目，十天半个号头会上演一通个。现在是看大勿到、听大勿到了。大家文明了。还有交关“掼”个上海闲话。掼纱帽，是撂担子。掼派司，是亮出证件。当然，搿个证件是硬档个，是显示后台个。掼派头，是讲究大个排场，是显露自家个手面，是凸出自家个气派。老上海人欢喜掼掼派头。一点派头也勿舍得掼要拨人家看勿起个。掼派头到了今朝是有点落伍了，现在是流行掼浪头了。掼浪头个本意讲大话、吹牛皮。不过上海人对有点本事个人来抬抬轿子、哄哄场面，也讲：“阿拉就等侬来掼浪头，大家可以开开眼界哉！”能够拿一把水掼出一把浪头、浪花出来，大家只好服帖。“掼侬三条横马路！”即是形容搿样子骄傲神气个脚色个。还有一句，叫掼炸弹。打仗起来飞机投弹是正宗个掼炸弹。引伸出来个俚语掼炸弹是指上茅坑个大方便。上海老百姓去掼炸弹勿是去打仗，只是解决内急。为周全解说“掼”字，搿一层勿说勿来三。请看官们原谅了。对勿住。