空闲时外出散步，常常经过一家人家，底楼，落地玻璃门，带只小花园，外表看上去，跟隔壁、再隔壁人家侪差勿多。

　　勿一样个是，迭家人家养仔一只八哥，而且，迭只八哥老欢喜闹猛，只要有人经过，伊就老热情个跟人家打招呼：哎、哎……侬好！侬好！总归老开心个样子。

　　我觉得搿只八哥相当讨人欢喜，美中不足就是觉着伊个声音勿大好听，有点哑，还有点抖抖索索，像煞年纪老大了。

　　心里一直蛮奇怪，勿是讲，鸟叫声侪是老婉转动听个嘛！

　　又有一天经过，花园门齐巧打开，一个胖呼呼、看上去总有七八十岁个阿婆走出来，看见仔人，马上笑眯眯打招呼：哎……侬好！一听搿声音，笑了，原来，迭只鸟是跟搿阿婆学个闲话。

　　前两天，一个朋友辣高铁浪向也碰着一个阿婆，阿婆还带仔一个小姑娘，四五岁个样子。朋友讲，小姑娘坐呒没坐相，吃呒没吃相，搿也算了，偏偏火车开得老快，经常会有晃动，小姑娘还辣过道里奔来奔去，一歇勿停，其他乘客侪看得心惊肉跳。

　　我个朋友实在屏勿牢了，就跟阿婆讲：勿好让小姑娘迭能样子奔来奔去，太危险了。

　　呒没想到，阿婆笑眯眯看牢仔自家小孙囡，头也呒没抬，从牙缝里轧出三个字：无所谓。

　　唉，阿婆与阿婆也是勿一样嗰，只不过无论是鸟还是小人，侪是要看样学样嗰呀！

　　【沪语解释】

　　抖抖索索：颤颤巍巍的样子。

　　齐巧：刚好。