对于排门板，老上海一定不会陌生，过去沿街店面，晚上关门打烊时，不像现在有金属卷帘门，都是由小伙计一块一块上排门板嗰，以至于上海人揶揄某人身材高大但行动呆板，会讲像“排门板”。

　　因为每块排门板个外形侪有差异，所以伙计上排门板个辰光必须按照一定次序进行，否则很容易卡住，交关店家为了让伙计不要搞错，排门板浪向侪有编号。店家为了让伙计用起来能比较省力，排门板宽度一般在一尺半左右。

　　老底子，木材供应非常紧俏，需按计划供应，普通人要有结婚证明，才可以凭小菜卡去木材行买点木头方子和本板料子，有辰光还只能买到旧木料。所以，埃个辰光啥人家屋里能够有一块排门板，是相当“吃价”嗰。当然，里弄人家用个排门板通常要比店家用个排门板宽一倍。过去一般住家侪比较狭窄拥挤，白天门板竖拉门后，到晚上，两张长凳或四张方凳一搁，就是一张三尺床铺。所以又叫铺板。

　　夏天有铺板个人家，晚饭常是辣辣弄堂里用长凳搁起铺板浪吃个。夜里纳凉，搬到树荫下或人行道边，铺上席子，又是小囡们纳凉和睡觉个凉榻。

　　阿拉小辰光课外学习小组和后来个“向阳院”小小班，侪是有铺板个人家拿出来，用长凳一搁，学生仔们坐辣小板凳浪，围拉四周做功课，交关方便。结束之后，再叠两条长凳，中间用两块砖头搁一根竹竿，就是乒乓台了。没有小伙伴一道白相，将木板竖辣墙边，一个人对着木板也可以打乒乓球白相半天。

　　这块铺板还有一个相当重要个用场是现在交关人想不到嗰，就是糊箔子。阿拉小辰光，交关勤俭持家个妈妈们侪是自己做布鞋拨小囡穿个。箔子，就是做鞋底和鞋面个基本材料。做法很简单，辣三伏天太阳最烈个辰光，将家里积存个碎布，用糨糊一层一层粘贴辣门板上，厚度自己掌握，贴满整块门板，放到太阳底下晒，晒干后扯下来，就是一整张做鞋子个材料了。做鞋底需要用好多层箔子按鞋底样剪好，根据需要个厚度相叠，然后再用鞋底线一针一针地纳鞋底，当年弄堂里个阿姨妈妈除了结绒线，最常见个女红就是纳鞋底了。

　　鞋面所用箔子一般一层就够了，里面衬上米白色龙头细布，鞋面则多用黑色直贡呢布，冬天个蚌壳棉鞋，还要辣辣当中铺上棉花。把箔子按鞋样剪好缝好后，就可以让鞋匠去绱了。也有能干个妈妈自己绱个，但绱完之后，一定会拿到鞋匠处用楦头揎一揎，揎过个鞋子才挺括，有样，合脚。平时，阿拉还可能会穿球鞋或跑鞋，但春节穿个新棉鞋，一定是姆妈亲手做嗰。

　　辣辣阿拉儿时个夏天，那块铺板成为了弄堂里所有妈妈阿姨个宠物，大家轮流着晒箔子，一扇铺板，构成了弄堂里一道独特个风景线，也是邻里情深个见证。