勿字，上海话读若“伐”（入声），伊个历史可以溯源至上古时代个甲骨文。辣甲骨浪刻字个重要功用，就是占卜；而占卜常见个方法是对贞，就是从正面、反面反复诘问同一桩事体。葛末就肯定要用到表示否定个字。所以，“勿”搭仔“不”“弗”“无”“亡”等字老早就侪有了。

　　“勿”辣古代是个常用字，好比普通话里个“不”字。现在难板看得到而且也仅仅限用于书面语，像“请勿吸烟”咾啥。这大概与宋元以后汉语入声逐渐消失有关。不过迭个“勿”字辣上海话中依然活跃。大多数情况下，上海人侪用“勿”来代替普通话个“不”，比如与动词、形容词咾啥形成稳定搭配个否定词：勿响（不作声）、勿哪能（不怎么样）、勿够事（不够）。再有是与名词构成新个形容词词组：勿上品（品格不高）、勿囫囵（不完整）、勿识头（倒霉）。还有用辣补语结构当中，表示勿可能达到某种结果：装勿落（装不下）、拎勿清（不明事理）、罢勿来（免不了）、吃勿消（受不了）。至于含有“勿”字个成语就更加多了。

　　迭个“勿”字辣吴侬软语中相当受到重用，以至于有文人生造了交关搭伊相关个合音、合体字。其中影响最大个是“覅”，由“勿要”两字相合，读作fiao，意思就是勿要；“覅”字已收入多部词典、进入电脑汉字字库。另有“會勿”，上海话读若“凡”，意思是不会。还有“曾勿”，上海话读若“文”，是不曾、未曾个意思。老底子嘉定区个人见面打招呼，用字交关节省。譬如一个人问：有没有吃过饭？另一人回答：没有吃过。两人是搿能对话个：“饭阿曾吃过？曾勿口来！”。（“阿曾”，读若“昂”，意思是：是否已经）。