老底子上海人去公共浴室“汏浴”，侪叫“到混堂里去”。要是汏好浴再闭目养神，迭种放松心情个享受叫“孵混堂”。

　　葛末为啥叫“混堂”呢？我个理解蛮形象个，老早男浴室里总有个七、八平方米大，一米深个水池，池子壁下一半地方有一圈台阶，放满水后大人坐辣台阶浪惬意浸泡，小人也可以立辣水池里。水温40摄氏度上下，整个空间雾气腾腾相当暖热。上海人习惯称比较大个房间为“堂”，会客叫“客堂”、上课叫“课堂”、吃饭叫“食堂”。大家混辣一个水池里汏浴，勿叫“混堂”叫啥呢？

　　另外，因为大水池里个水往往比较浑浊，搿个“浑”跟“混”辣辣上海闲话里读音是一样嗰，迭种腔势个地方叫伊“混堂”勿是蛮名正言顺嗰嘛。

　　再讲老早多数人家屋里呒没汏浴间，特别过年又是大冷天到混堂里去汏浴暖热，浑身汏汏清爽讨个口彩。所以大年夜前两天，混堂生意绝对是高峰，每家浴室门口侪轧满男女老少等辣汏浴，乱哄哄像是小菜场。我老早住辣老城厢里，东面有西城浴室，西面是西门浴室，原本浴室侪是下半日营业，过年前几天侪是全天开放。因为西门浴室开辣老西门个闹猛地方，去个人比较多，我反而喜欢去稍许远点个西城浴室，倒勿是人少，而是搿爿混堂里还有剃头服务，可以“一手落脚”从头到底侪弄清爽。

　　当侬走进立满人个水池里，跟熟人打打招呼搓搓背也真扎劲，冲淋浴地方还要排队，雾腾腾个赛过辣“庙里烧香，人像插蜡烛”，迭种辰光汏浴勿到混堂里来，到啥地方去呢？

　　混堂里也有勿混个，只要多花点钞票，有沙发躺椅，修脚、搓背样样煞清。再想适意有包房、有泡浴缸里汏浴叫“盆汤”，迭些只好算是混堂里个小部分。随着单位、家庭个汏浴设施完善，混堂就慢慢远离阿拉了。现代搿排里个日本桑拿、芬兰桑拿搭仔温泉汏浴看起来高级，勿过混堂作为曾经个市井生活常常会拨阿拉回忆起来。掼勿开个就是“情结”！