前几天去参观一幢上海老洋房。我不由想起小辰光自家屋里“生煤炉”个事体。放到现在，大多数年轻人已经勿晓得啥叫“生煤炉”了，但辣辣阿拉小辰光，烧饭、烧菜、烧开水侪离不开“生煤炉”。

　　记得，阿拉屋里最早用个煤炉是烧煤球嗰。搿种炉子勿好“封”过夜，所以不仅每天侪要“生煤炉”，而且早浪向辰光紧张，爷娘要上班，我和阿弟要上学，“生煤炉”需要花勿少辰光，经常来勿及烧早饭。屋里只好又备了一只火油炉子，专门用来早浪向烧泡饭。火油炉子用起来便当，但是用过以后，房间里一股火油味道，邪气难闻，实在倒胃口。

　　后来，为了解决居民烧早饭个难题，街道干部牵头办了一家公共灶台，有十几只小灶眼，只要一分洋钿就可以烧一小镬子泡饭。自从有了公共灶台，我每天早浪第一桩事体就是端一小镬子放好开水个泡饭去烧一烧。再端回去，同爷娘一道吃热吹潽烫个泡饭加酱菜，既便当又落胃。当然，缺点也有，过去早浪来不及烧饭，爷娘有辰光就会拨我几角洋钿，叫我出去买点大饼油条回来当早饭。对我来讲，搿就是“改善伙食”。有了公共灶台，早浪向“改善伙食”个次数就少脱交关了。

　　再后来，煤球炉经过小炉匠炉芯改进，可以“封”过夜了。搿能一来，只要前天夜里，用湿煤灰层“封”牢炉子，早浪捅开搿层煤灰，火头就起来了。勿过，搿对“封炉”个技术要求比较高，有辰光呒没“封”好，早浪发现炉子隐脱了，还是要去用公共灶台。

　　又过了一段辰光，煤球炉再次升级换代，变成了煤饼炉。煤饼是圆柱形，当中有十二只洞眼。同煤球炉相比，煤饼炉不仅火头炀，而且“封”过夜便当，每天烧好、弄好，炉子上面盖一只新煤饼，下头炉门一关就好了。勿过，万一炉子隐脱了，生炉子也比煤球炉难，要用交关纸头、柴爿才能拿炉子生起来。记得当年，我为了生煤饼炉吃过勿少苦头。幸亏住辣三楼个王家姆妈热心，好几趟侪是伊来帮忙生炉子，屋里才吃得成饭。

　　讲到煤饼炉，就勿能勿提煤饼。起初，阿拉屋里是买店里做好个煤饼。后来为了省钞票，就到煤饼店买煤灰、租煤饼模子，我搭仔阿弟一道做煤饼。煤饼哪能做？其实也简单，就是煤灰按一定比例加水拌成浆糊，然后倒进模子里面成形。模子分为上模下模，上模有十二根铁杆，下模有十二只洞眼，上模下模合起来，就可以做成煤饼。阿拉屋里每个月需要烧一百多只煤饼，侪是我跟阿弟两个人一只一只用模子敲出来嗰，弄得身浪向面孔浪向侪是煤灰。

　　有了煤饼炉，解决了勿少问题，但是也带来了新问题。阿拉住个石库门房子里有四家人家，还有一间房子被隔壁工厂占用，四家人家白天烧饭烧菜侪辣客堂间，夜里封好个炉子还摆辣客堂间。阿拉屋里就辣客堂间楼上，白天房间里侪是油烟菜香，夜里侪是煤气味道，大热天更是像辣烧烤。连老几年向街道里弄和工厂上级领导反映情况，终于要回迭间房子充当灶披间，阿拉屋里才算摆脱油烟味道和煤气味道。

　　我姆妈是小学老师。1983年区教育有关部门根据阿拉“房小人多”个实际情况，分拨阿拉一套新工房，位置离老房子三条横马路，房子勿大，但煤卫独用，有抽水马桶、浴缸和煤气灶，再也用不着天天拎马桶，汏浴又便当，特别是煤气烧起饭菜又快又清爽，老邻居侪眼热得不得了。

　　我大学毕业以后还进入学堂工作，女朋友谈了好几年就是呒没房子结婚，眼看年龄越来越大，还好单位领导关心，分到天山新村一间房。房子小了眼，煤卫也全嗰。成家后单独“开火仓”，也蛮便当乐惠嗰。迭能过了几年，煤气公司又为阿拉小区改换天然气。迭个天然气邪气灵光，煤气味道一眼也闻勿着，火力比煤气强出好几倍，不但烧饭烧菜辰光缩短，热水器出热水个速度也快交关。

　　从老早子烟熏火燎个煤球炉，到清爽方便个“煤卫独用”，再到既安全又好用个天然气，迭个也体现出改革开放勿断为阿拉老百姓带来个福利。