春节能放七天假，交关家庭会抽出几天到处走走看看。葛末看点啥呢？与自然风光为主个旅游景点相比，我反而比较欢喜到展览馆里走马观花。

　　同我有一样爱好个人勿少，事实浪向，上海现在每年侪有交关展览，勿管是大人还是小孩，侪欢喜去看展览，有辰光场馆里人多得要潽出来，迭个辰光，展览馆里个保安爷叔就派大用场了。勿晓得侬留心过口伐？上海展览场馆里个保安蛮多侪是上海爷叔，有辰光听伊拉讲闲话也蛮扎劲嗰，不单单是亲切，有辰光伊拉真个蛮专业嗰。

　　春节前几天我去上海博物馆看董其昌展览，因为有两幅画是从其他馆借来嗰，只展出十天，所以人老多嗰。懂经个人么进来就直接问保安爷叔——“师傅，《昼锦堂图》辣啥地方啊？”爷叔抬手就能指出方向。就算有人问只展出十天个画辣啥地方？爷叔一样勿打搿愣。游客表扬伊个辰光，伊倒也勿谦虚，头微微一扬，笑眯眯讲：“大约莫么阿拉侪晓得嗰呀”。问伊拉介灵个画自家有空看勿啦？伊拉马上讲：“侬帮帮忙哦，天天介许多人，管人也来勿急……”闲话讲到一半，又到一边去忙了。

　　我去个辰光离闭馆只有半个钟头了，保安爷叔拼命劝大家勿要排了，肯定排勿到了，但是还是有人为了看苏东坡真迹求保安爷叔帮忙，爷叔一边劝勿要排了，一边对前面已经进去个观众喊：“走起来好口伐，勿要立辣勿动，侬要看嘛人家还想看嗰呀，大家体谅一下！”“拍好照片个人么快点走呀，回去再细细看！”“总归看勿光了，明朝再来。”……保安爷叔讲嗰实际上侪是大家心里想嗰，搿能介一喊，一方面让排队个人勿要太焦虑，一方面也催促展厅里向个人走起来，现场秩序维护得忙而勿乱，也是一种水平。

　　还有一趟我去上海图书馆看古籍装潢展览，一开始保安爷叔一直劝大家勿要拍照，后来看大家侪偷偷交拍，伊拉管勿过来，就索性立辣一边议论起来——“叫阿拉管，阿拉哪能管得过来，介好个物事，几十年呒没拿出来展览过了，勿拍也可惜，闪光灯倒是勿要用，对古籍勿好。”虽然同伊拉个工作职责有点违背，但爷叔们讲个闲话真个贴心。正当大家参观得陶醉个辰光，伊拉要准备清场了，“大家抓紧看，还有十分钟。”“还有五分钟，抓紧走起来，阿拉之前就提醒过大家嗰。”“还有一分钟，要看请大家明朝再来看。”迭个是我第一趟碰到以分钟来倒计时，老有紧迫感嗰。

　　我觉得展览馆里个保安爷叔特别善于换位思考，真个是想大家所想，所以管理起来大家侪服帖，伊拉迭种管理就像展览馆里个艺术品，也是一种艺术。