记忆里小辰光吃过个上海小吃邪气多，其中印象最深嗰就是豆腐花，配料多种多样，味道各有特色。

　　埃息辰光卖豆腐花，勿像现在需要设店摆摊，大多数是由货郎挑一副担子走小街穿弄堂，一边吆喝一边兜售。担子一头有一只木桶，里向装满雪雪白个嫩豆腐，另外一头是一只小木柜，柜子里有许多小格，分门别类放满各种配料，比如：虾皮、紫菜、榨菜、香菇、木耳、香菜、蛋皮、百叶，还有各种调料，甜酸咸辣一应俱全，尤其是盛酱麻油个瓦罐，炖辣红泥小火炉上，热气腾腾，阿拉搿种馋痨坯一看到就馋唾水嗒嗒滴。

　　我小辰光勿欢喜吃香菜，但是货郎会摆噱头，讲：香菜健胃，驱风排毒，水归膀胱，食归大肠。结果家长听了连连点头，多出一分洋钿添点香菜做浇头。

　　另外还有两种豆腐花，一种是先辣豆腐花浪浇上一调羹用菌菇调制个蕈酱油，再滴几滴辣油、麻油，放几只开洋，嘴巴一咪，鲜得勿得了。另一种是拿煨得浓浓个爆鱼汁水或糖醋排骨汁水浇辣豆腐花浪，再洒点葱花、姜末、香菜、辣油、胡椒粉，别有滋味。

　　现在进小吃店，看到餐牌浪有豆腐花，还是经常会点一碗尝尝，但是已经吃勿出小辰光个味道，想想实在有点勿捂心。