一到大冷天，交关人侪欢喜吃火锅。其实老底子上海人拿吃火锅叫做“吃暖锅”。而且迭只暖锅个材质搭子形状同现在大家常用个火锅是勿一样嗰。

　　老底子个暖锅是由铜匠师傅用黄铜板或紫铜板靠手工敲出来嗰，伊个形状是：当中是一只炭炉，炭炉当中位置有一圈十几厘米宽个檐口形成凹槽，凹槽上面有盖。用个辰光，先辣凹槽里加满汤料，再拿炭炉点燃，依靠炭炉拿凹槽里个汤料烧开以后就可以端上台面了，之后朝汤料里放鱼圆、肉圆、蛋饺、黄芽菜、油豆腐、线粉、肉皮等菜品。等汤料再次烧开，一家人围桌而座，一面烧一面吃，热气腾腾其乐融融。

　　听起来好像同现在个火锅吃法差勿多，其实区别还是蛮大嗰，现在吃火锅重点辣辣“涮”，涮好以后还要蘸调料。老底子吃暖锅重点辣辣吃伊个“什样景”，吃伊个“鲜”，因为一只暖锅里各种各样物事侪有，鱼圆、肉圆……各有各个味道，最后暖锅里个汤因为融和了各种食材个味道，所以“鲜”得勿得了，用上海闲话讲就是“可以拿侬眉毛也鲜脱”。

　　记得小辰光市面浪物资供应紧张，副食品侪要凭票限量供应，过年吃暖锅就是我最开心个辰光。每当姆妈把凭票供应个年货买回来，爸爸就会把平常用报纸里三层外三层包得严严实实个紫铜暖锅寻出来，汏清爽。然后，从年三十到正月十五搿段辰光里，搿只精光锃亮个大铜锅就会经常摆到桌头浪。而且伊每次亮相，里向摆个料作（食材）也是勿一样嗰，比如辣辣吃年夜饭搭子春节里向有亲眷来拜年个辰光，迭只暖锅里烧个料作会有冬笋片、香菇、鱼圆、肉圆、肉皮、爆鱼块、蛋饺、油豆腐搭仔线粉，等到最后再添眼黄芽菜或者菠菜清清口。假使有长辈，就要再考究一眼，暖锅个汤料里还会得加眼鸡汤或者骨头汤。

　　勿过，平常辰光，迭只暖锅里摆个料作侪是隔夜个剩汤剩菜，大勿了再添一眼油豆腐线粉，阿拉拿搿种暖锅叫做“一锅烩”。用现在个眼光来看，好像有点清苦，但辣辣当时，有得暖锅吃就是一桩开心事体，毕竟吃暖锅个日脚一年里向只有过年个辰光才有。而且，一家人一道吃暖锅不仅仅是为了吃锅子里个花样经，还能从里向吃出浓浓个亲情味道搭仔家个温暖。