日脚过得真快，己亥年春节已经过去，热闹之余我勿由得回想起小辰光过年个情景。当时过年除脱有吃、有穿、有白相，我另有一桩开心事体，就是看年画。

　　上世纪40年代初，我出生辣被称为“下只角”个沪西曹家渡。其实呢，过年辰光，下只角也有下只角个闹猛。大约摸离春节还有半个来月，曹家渡长寿路口裕民毛纺厂（1966年10月改为第七毛纺织厂）百来米个围墙就会变成年画个世界。

　　为啥呢？有两方面个原因。一是此地多老弄堂、老房子，附近居民过年欢喜辣门浪贴春联，屋里贴年画，图个喜气。二是迭段围墙距曹家渡闹市口几十米，人行道稍宽，闹中取静，朝向又偏南。做年画生意个人看中迭块风水宝地，侪欢喜到搿搭摆摊头。搿堵围墙是用红砖垒砌嗰，只要辣砖块缝隙里打几只木榫，再攀扎纱绳，用夹子固定，就可以拿一幅幅年画挂得鳞次栉比，琳琅满目，就像一场“年画展”。只要天气晴好，阳光煦暖，一边看年画，一边孵太阳，老乐惠嗰。我当时已经读小学，能识字看书，也是“年画展”个老观众。

　　伊个辰光，年画内容绝大多数侪很传统，比如身上、腿上爬满小囡个笑弥勒，象征多子多福，特别受欢迎。“刘海戏金蟾”寓意财源兴旺、生活吉祥美好，买个人也勿少。另外，还有“福禄寿”“鲤鱼跳龙门”等等，寓意吉利喜庆。老年纪男人欢喜买“钟馗捉鬼”搭仔“关老爷”，避邪消灾，镇宅看门。女人家呢，就喜欢轧到“采茶扑蝶”“梁山伯与祝英台”“红楼梦”“西厢记”“孔雀东南飞”等有戏曲味道个画前，指指点点，叽叽喳喳，说长道短。

　　我呢，顶欢喜看一幅叫“水泊梁山”个年画。迭幅画拿“一百零八将”夯拨郎当侪画进去了。画面有点像山水画，上面是山，中间是水，下面是平原。画面上部偏左有个山寨，宋江、吴用、卢俊义、公孙胜等首领立辣寨门前，目视远方，面带笑容，山寨里旗帜飘舞，显出鼎盛气势。画面中部有一条大河，河里有“浪里白条”张顺，岸边有阮家兄弟。画面下部则是一大批名将，如“霹雳火”秦明、“小李广”花荣、“双鞭”呼延灼、“双枪将”董平、“金枪手”徐宁、“铁叫子”乐和、“拼命三郎”石秀等。搿眼人物侪画得邪气有个性，个个活灵活现，弹眼落睛。特别让我忘记勿脱个是，画面右上角山路浪有一个健步如风个“神行太保”，房顶浪还有一个贼头贼脑个“鼓上蚤”，真是精彩。

　　后来，我问阿爷要了两角洋钿拿伊买了回去，贴辣床头旁边个板壁浪，每天早浪醒过来，辣被头筒里就能看到梁山英雄……60多年过去了，我还是会经常想起小辰光逛“画展”看年画个事体。