拜年是中国传统习俗，是大家相互表达美好祝愿个一种方式。小辈给长辈拜年，子女给父母拜年，长辈给小囡发压岁钱，其乐融融，笑声勿断，但是也有例外。

　　大江是电气班班长，属于伊拉厂里级别最低个领导干部。按惯例，班长春节要挨家挨户去“鞠躬”，给班组里个兄弟们拜年。有一年节前大江对大家打招呼，希望大家拿自家个“春节排片表”告诉伊，伊好设计“拜年路线图”。啥人晓得兄弟们听了侪连连摇手，动作整齐划一，看起来就像辣辣跳集体舞，表示春节里忙来西，呒没空接待领导。大家提出来个理由各勿相同，有回乡过年，有全家出游……廿几个人里向只有实习生小杜留辣上海过年，其他人侪勿辣上海。也就是讲，今年大江只要去小杜屋里一趟，就可以完成全部拜年任务了。虽然省力勿少，但是大江还是心里勿爽。

　　大年初一，大江拎了一点水果走进小杜住个青年公寓。突然听到屋里有一个声音恶狠狠讲：“侬马上就死了，还朝啥地方逃？”大江一怔，勿晓得屋里发生了啥事体。“我勿相信介容易死！”迭个是小杜个声音。有人要杀小杜？大江马上加快脚步。刚到门边，又有一个人讲：“算了，逃也没有用，侬就死心吧！”听声音好像是刘玲。大江呆若木鸡，班组里平常辰光和和睦睦，风平浪静，想勿到人心险恶，居然就要闹出人命来了。

　　大江看到门好像呒没锁，顾勿得敲门，用力一推就冲了进去，一看，顿时哭笑勿得。原来小杜正辣同别人走象棋，刘玲搭仔几个同事辣旁边七张八嘴出主意。再看看四周，大江发现班组里个兄弟们居然一个勿落，侪辣搿搭。伊拉勿是侪讲过年期间勿辣上海吗？到底是哪能桩事体？

　　看到大江面孔浪个吃惊表情，大家侪哈哈大笑。最后，还是刘玲告诉大江；“班长，侬忙了一年了，大家勿忍心让侬春节里还要挨家挨户跑，所以讲好到小杜搿搭集中，让侬跑百家勿如跑一家！”小杜也插上来讲：“班长，阿拉侪辣等侬来，大家侪要脱侬拜年！侬辛苦了！”听了搿眼闲话，大江感到鼻头一酸，眼圈里有眼湿搭搭。

　　大江是我个朋友，搿桩事体是伊告诉我嗰，虽然小，但显示出伊拉同事间个情谊。