小区里个“邻里中心”搿几日又开始闹猛了。老娘舅参加个乒乓队日日有人抽大板削弧球，棋牌队三、五下半日车马炮咾打八十，老舅妈参加个健身操队告【和】舞蹈队，也放起了勿同节奏个音乐，还有歌咏队、太极拳队、电脑班、剪纸班、诗词班、书法班咾啥侪“开学”了。邻居道里交关辰光勿碰头，小朋友拉个寒假一结束，大家豪燥赶快聚拢来了。一见面，老阿哥老阿姐眉开眼笑，话个勿停。大家又好跟仔老师学本事，热热闹闹搞活动，轻轻松松健身心了。

　　小朋友一开学，邻里中心老年活动也全部“开学”——原来啊，现在个老人是跟牢仔小囡跑，小朋友读书了，只要早送晏接，当中间里空出来个辰光就可以参加小区个活动；小朋友放假了，交关人侪要陪小囡，呒辰光参加团队活动，葛末只好停脱、放假。老娘舅搿辈人，年纪轻个辰光插队落户到农村，回城之后里弄里向生产忙，要想学习呒没空档，要想白相已经到了退休辰光。告咾【所以】大家退休仔侪特别珍惜参加团队活动个机会，年轻辰光呒没来得及好好叫“野”够、“疯”够，现在要杀杀搏搏【开足马力】补回来。参加团队活动，老年人兴趣侪一样，共同话语多，生活更充实，精神特别爽。告咾大家侪蛮看重、蛮积极、蛮欢喜个。老舅妈就半开玩笑半当真个对老娘舅讲：“侬啊，白相心比老早重了！”不过，白相心再重，也比勿上做长辈个责任心重，比勿过一家人个亲情重。侬看，小囡一放假，大家就心甘情愿个厾脱参加集体活动个爱好，一门心思回去过退休老人个“寒暑假”了。

　　寒暑假实际浪向是老人个忙档。除脱一日三顿买、汏、烧，还要为小囡烧点心、弄水果，陪小囡做假期作业，陪小囡讲故事白相玩具，领伊拉去参加各种培训班，代替爷娘带伊拉参加亲子活动，领伊拉辣小花园里散步白相，还要陪小囡复习培训班个课程或者弹琴画图背唐诗，真个再也呒没闲档了。老娘舅就告大家打棚【开玩笑】，讲葛就是阿拉退休老人个“寒暑假”。

　　尽管“放假”个搿段日脚比平常还要吃力还要忙，人做得来老衰瘏【sadhu疲惫】个，但是面对每日天繁杂而又单调个家务，天天被孙辈“套牢”辣屋里向，老娘舅咾啥一眼也勿懊恼。因为大家侪是搿能介做个，因为大家侪晓得，抚育小辈是自己应尽个责任，“若要好，老伴小”，自家再辛苦再烦劳也是值得个。看到小辈一日日成长起来，心里向就来得个开心，开心得来赛过一切。老娘舅咾啥侪晓得，生活本身就是有紧有松个，该紧个辰光阿拉就紧一眼，有条件松个辰光再宽松宽松。再讲参加小区活动是弄个开心；寒暑假里陪小囡，阿拉心里更加开心。

　　真是：围牢仔孙辈过日脚，小囡读书大人“野”，一道放起寒暑假，老人从早忙到夜。